ధోని తన వన్డే కెరీర్లో ఆడిన మరుపురాని ఇన్నింగ్సులు

ధోని తన వన్డే కెరీర్లో డకౌట్ తో మొదలెట్టి 10,000 పరుగులు చేసి జట్టు అవసరం అన్నప్పుడు నేనున్నాను అని నిలిచి అనేక గొప్ప ఇన్నింగ్స్ లు ఆడి జట్టుని విజయతీరాలకు చేర్చిన సందర్భాలు అనేకం. ముఖ్యంగా అయన చేసింగ్ లో మ్యాచ్  ఆఖరివరకు క్రీస్ లో పాతుకుపోయి చివర్లో మ్యాచ్ ను ప్రత్యర్థుల చేతులనుండి లాక్కుని ప్రపంచ గొప్ప ఫినిషర్ గా పిలవబడ్డాడు. తన మొట్టమొదటి అంతర్జాతీయ వన్డే 2004 డిసెంబర్ 23 న చిట్టగాంగ్ లో బంగ్లాదేశ్ తో ఆడాడు. కానీ అతని ఆరంభమేమి అంత బాగా లేదు. ఈ మ్యాచ్ లో అనవసరమైన పరుగుకి వెళ్లి డకౌట్ గా వెనుదిరిగాడు. ధోని ఈ సిరీస్ లో  మూడు మ్యాచ్ లకుగాను కేవలం 19 పరుగులు మాత్రమే చేసి ఎంతో పేలవంగా ఆడాడు. కానీ తన ఆత్మస్థైర్యాన్ని మాత్రం విడిచిపెట్టలేదు.

వన్డేలలో ధోని ఆడిన గొప్ప ఇన్నింగ్స్ లు:


148 vs పాకిస్థాన్, 2005

2005 ఏప్రిల్ లో విశాఖపట్నంలో పాకిస్తాన్తో జరిగిన మ్యాచ్ లో కెప్టెన్ గంగూలీ ధోనిని మొదటి  స్థానంలో బ్యాటింగుకు పంపగా అందివచ్చిన అవకాశాన్ని ఒడిసి పట్టుకుని ఇదే చివరి అవకాశమని 123 బంతుల్లో 15 ఫోర్లు, 4 సిక్సర్లతో 148 పరుగులు చేసి తానేంటో నిరూపించుకున్నాడు. ఈ సిరీస్ ద్వారానే అంతర్జాతీయ క్రికెట్ లో ధోని ప్రస్థానం మొదలైనది. దీని తరువాత ధోని వెనుదిరిగి చూడనేలేదు. 

183 vs శ్రీలంక 

2005 అక్టోబర్ 31 న జైపూర్లోని సవాయ్ మాన్ సింగ్ స్టేడియంలో శ్రీలంకతో మూడవ మ్యాచ్ జరిగింది. ఈ మ్యాచ్ లో శ్రీలంక నిర్దేశించిన 299 పరుగుల లక్ష్యాన్ని ఛేదించడంలో ధోని ఆకాశమే హద్దుగా రెచ్చిపోయి 145 బంతుల్లో 10 సిక్సర్లు, 15 ఫోర్లతో 183 పరుగులు చేసి దీపావళి ముందురోజున పగలే చుక్కలు చూపించి చేసింగ్లో  అత్యధిక పరుగులు చేసినవాడుగా ప్రపంచ రికార్డు సృష్టించాడు. ఈ ఇన్నింగ్స్ తో అతడు ధనాధన్ ధోని అని పిలవబడ్డాడు. ఈ సిరీస్లో ధోని మాన్ ఆఫ్ ది సిరీస్ అందుకున్నాడు. 

2006 పాకిస్థాన్ సిరీస్ 

2006 వ సంవత్సరం పాకిస్థాన్ ప్రాతినిధ్యం వహించిన సిరీస్లో మొదటి మ్యాచ్లో 53 బంతుల్లో 68 పరుగులు, మూడవ మ్యాచ్లో 46 బంతుల్లో 72 పరుగులు, 5వ మ్యాచ్లో 56 బంతుల్లో 77 పరుగులు చేసి ఈ సిరీస్లో నాలుగే ఇన్నింగ్సుల్లో 136 స్ట్రైక్ రేట్ తో 219 పరుగులు చేసి సిరీస్ ఆసాంతం పాకిస్థాన్ బౌలర్లతో ఆడుకున్నాడు. 

139 vs ఆఫ్రికా-11, 2007

2007 జూన్ 11 న ఆసియ-11, ఆఫ్రికా -11 మధ్య జరిగిన మ్యాచ్లో 72 పరుగులకే 5 వికెట్లు పడిన సమయాన బ్యాటింగ్ కు దిగి 97 బంతుల్లో 15 ఫోర్లు, 5 సిక్సర్లతో 139 పరుగులు చేసి విజయంలో కీలకపాత్ర పోషించాడు. 

109 vs హాంకాంగ్, 2008

జూన్ 25 2008 న ఆసియా కప్లో హాంకాంగ్ తో జరిగిన మ్యాచ్లో 96 బంతుల్లో 6 ఫోర్లు, 6 సిక్సర్ల సహాయంతో 109 పరుగులు చేసాడు. 

124 vs ఆస్ట్రేలియా, 2009 

28-10-2009 న నాగపూర్లో ఆస్ట్రేలియాతో జరిగిన మ్యాచ్లో 107 బంతుల్లో 9 ఫోర్లు 3 సిక్సర్లతో 124 పరుగులు చేసి మాన్ ఆఫ్ డి మ్యాచ్ అవార్డు అందుకున్నాడు. 

107 vs ఆస్ట్రేలియా, 2009

18-12-2009న నాగపూర్లో ఆస్ట్రేలియాతో జరిగిన మ్యాచ్లో 111 బంతుల్లో 107 పరుగులు చేసాడు. దురదృష్టవశాత్తూ ఈ మ్యాచ్లో ఇండియా ఓడిపోయింది. అయినప్పటికీ ఇది ఒక ప్రత్యేకమైన ఇన్నింగ్స్. 

113 vs పాకిస్థాన్ 

30-12-2012 న చెన్నైలో పాకిస్థాన్ తో జరిగిన మ్యాచ్లో 29 కె 5 వికెట్లు నష్టపోయి పీకల్లోతు కష్టాల్లో పట్టిన జట్టును తన పోరాటపటిమతో 125 బంతుల్లో 7 ఫోర్లు, 3సిక్సర్లతో 113 పరుగులతో భారత్ గౌరవప్రదమైన స్కోర్ చేయడానికి దోహదపడ్డాడు. ఈ మ్యాచ్లో ఓడిపొయ్యినప్పటికీ ధోని ఒంటరిపోరాటం చేసి చిరస్మరణీయ ఇన్నింగ్స్ ఆడాడు. 

139 vs ఆస్ట్రేలియా, 2013

19-10-2013న మొహాలీలో ఆస్ట్రేలియాతో జరిగిన మ్యాచ్లో టాప్ ఆర్డర్ ఆడకపోయినప్పటికీ తన గొప్ప ఆటతీరుతో నేనున్నాను అంటూ మరోసారి 121 బంతుల్లో 12 ఫోర్లు, 5 సిక్సర్లతో 139 పరుగులు చేసాడు. 

91 vs శ్రీలంక  2011

02-04-2011 న శ్రీలంకతో జరిగిన వరల్డ్ కప్ ఫైనల్ మ్యాచ్లో 79 బంతుల్లో 8 ఫోర్లు, 2సిక్సర్లతో 91 పరుగులు చేసి 28 సంవత్సరాల తరువాత ఇండియాకు వరల్డ్ కప్ తెచ్చిపెట్టాడు. ఇది భారతదేశ అభిమానులు మరువలేని ఇన్నింగ్స్. 

ధోని తన వన్డే కెరీర్లో ఇంకా అనేక మరుపురాని ఇన్నింగ్సులు ఉన్నప్పటికీ ఇవి ప్రధానమైనవి అని చెప్పుకోవచ్చు.  

ధన్యవాదాలు. 
మీ అభిప్రాయాలు మాకు తెలియజేయగలరు.