అంతర్జాతీయ టెస్టుల్లో అధిక వికెట్లు తీసిన వారి టాప్ 10 జాబితా, Highest wicket takers in Test matches

 టెస్ట్ ఫార్మాట్ అనేది క్రికెట్ అభిమానులకు ఆరంభంనుంచి నిజమైన క్రికెట్ ను రుచి చూపిస్తూ వస్తుంది. అందుకే క్రికెట్ పండితులు టీ20, వన్డేలకన్నా టెస్ట్ క్రికెట్ అనేది చాలా కఠినమైనదిగాను ఆటగాళ్లకు నిజమైన పరీక్షగాను వర్ణిస్తూ ఉంటారు. టీ20లు అనేవి బ్యాట్సమన్లకు బాగా అనుకూలమైనవిగా ఉంటాయి. కానీ టెస్ట్ ఫార్మాట్ అనేది బ్యాట్సమన్లకు బౌలర్లకు మధ్య నడిచే ఒక  సవాలుగాను, ఒక పోరాటంగాను ఉంటుందని చెప్పవచ్చు. ఇందులో మనం టెస్ట్ బ్యాట్సమన్లను క్రీజులో కుదురుకోకుండా కలలో కూడా కలవరపెట్టి జట్టును పూర్తిగా కుప్పకూల్చి తమ జట్టు విజయాలలో అండగా నిలిచి  టెస్టుల్లోనే అధిక వికెట్లు తీసి బ్యాట్సమన్ల గుండెల్లో గుబులు పుట్టించినవారి  వివరాలు తెలుసుకుందాము. 

అంతర్జాతీయ టెస్టుల్లో అధిక వికెట్లు తీసిన వారి టాప్ 10 జాబితా

1. ముత్తయ్య మురళీధరన్ (శ్రీలంక):

బ్యాటింగ్ రికార్డులను చర్చించాలంటే  సచిన్ టెండూల్కర్ ఎలాగయితే అన్ని  రికార్డులలో ఇమిడి ఉంటాడో, బౌలింగ్ విషయంలో మురళీధరన్ కూడా  అలాగే ఇమిడి ఉంటాడు. తన బౌలింగ్ పై అనేక విమర్శలు వచ్చినప్పటికీ  తన స్పిన్ మాయాజాలంతో మేటి ఆటగాళ్లను సైతం బోల్తా కొట్టించి ప్రత్యర్థులను పేకమేడల్లా కూల్చి తన టెస్ట్ కెరీర్ లో ఆఖరి బంతికికూడా వికెట్ తీసి 800 వికెట్లు తీసిన మొదటి ఆటగాడిగాను టెస్టుల్లోనే అధిక వికెట్లు తీసినవాడుగా ఎవరికీ అందనంత ఎత్తులో నిలిచాడు.

మ్యాచ్ లు           -   133
ఇన్నింగ్స్            -   230 
వికెట్లు                -    800
సగటు                -   22.72 
బెస్ట్(ఇన్నింగ్స్)   -    9/51 
5 వికెట్లు             -    67
10 వికెట్లు           -    22 

2. షేన్ వార్న్( ఆస్ట్రేలియా):

షేన్ వార్న్ టెస్ట్  క్రికెట్ లో  మొట్టమొదటిసారిగా 700 వికెట్లు పడగొట్టిన ఆటగాడు. ఇతడి బౌలింగ్ ఎంతో వైవిధ్యంతో కూడుకున్నదిగాను ఏ స్పిన్నర్ వేయలేని  గింగిరాలు తిరిగే బంతులు వేసి బ్యాట్సమన్ల పని పట్టి  పెవిలియన్ దారి చూపిస్తాడు ఈ స్పిన్ మాంత్రికుడు. 1993 లో మైక్ గాట్టింగ్ అనే ఇంగ్లాండ్ ఆటగాడికి లెగ్ స్టంప్ కి అవతల వేసిన బంతి ఆఫ్ స్టంప్ ని గిరాటేసి ప్రపంచ క్రికెట్ అభిమానులు నివ్వెరపోయేలా చేసింది. ఈ బంతిని ఐసీసీ వారు ball of the 20th century గా అభివర్ణించారు. ఇతడు టెస్టుల్లో అధిక వికెట్లు తీసిన వారి జాబితాలో రెండవ స్థానములో వున్నాడు. 

మ్యాచ్ లు               -    145 
ఇన్నింగ్స్                -    273
వికెట్లు                    -    708
సగటు                    -    25.41 
బెస్ట్(ఇన్నింగ్స్)       -    8/71
5 వికెట్లు                 -    37
10 వికెట్లు               -    10 

3. అనిల్ కుంబ్లే (ఇండియా) :

అనిల్ కుంబ్లే భారత్ కు ప్రాతినిధ్యం వహించిన అతి గొప్ప బౌలర్ అని చెప్పడంలో ఎటువంటి సందేహం లేదు. కెప్టెన్ వికెట్ ఆశించిన ప్రతిసారి తన స్పిన్ మంత్రంతో వికెట్లు రాల్చేవాడు. ఇతడు 1999 వ సంవత్సరంలో మన చిరకాల ప్రత్యర్థి అయిన పాకిస్థాన్ తో జరిగిన టెస్ట్ మ్యాచ్ లో 10 కి పది వికెట్లు తీసి ప్రపంచ క్రికెట్లో పదికి పది వికెట్లు తీసిన రెండవ బౌలర్గా నిలిచి ఒక చెరిగిపోని రికార్డు నెలకొల్పాడు. ఇతడు టెస్టులలో 619 వికెట్లతో మురళీధరన్, షేన్ వార్న్ తరువాతి స్థానంలో నిలిచాడు. 

మ్యాచ్ లు              -   132

ఇన్నింగ్స్               -   236 
వికెట్లు                   -   619
సగటు                   -   29.65 
బెస్ట్(ఇన్నింగ్స్)      -   10/74 
5 వికెట్లు                -   35 
10 వికెట్లు              -   8 

4. జేమ్స్ అండర్సన్ (ఇంగ్లాండ్):

జేమ్స్ అండర్సన్ టెస్టుల్లో 584 వికెట్లు పడగొట్టి టెస్టుల్లో అధిక వికెట్లు తీసినవారి జాబితాలో  నాల్గవ స్థానంలో నిలిచాడు. గత దశాబ్దంగా ఇంగ్లాండ్ కు తన స్వింగ్ బౌలింగుతో అనేక  మరపురాని విజయాలను అందించి ఇంగ్లాండ్ బౌలింగుకు వెన్నెముకగా నిలిచాడు. ఇతడు ఇంగ్లాండ్ తరుపున అధిక వికెట్లు తీసినవాడు మాత్రమే కాక ప్రపంచ గొప్ప స్వింగ్ బౌలర్లలో ఒకడు అని చెప్పడంలో ఎటువంటి సందేహం అవసరం లేదు. 

మ్యాచ్ లు             -  151 
ఇన్నింగ్స్              -  282
వికెట్లు                  -   584
సగటు                  -   26.83 
బెస్ట్(ఇన్నింగ్స్)     -   7/42 
5 వికెట్లు               -   28
10 వికెట్లు             -   3

5. గ్లెన్ మెక్ గ్రాత్ (ఆస్ట్రేలియా):

గ్లెన్  మెక్ గ్రాత్ క్రికెట్ చరిత్రలో ఒక గొప్ప ఫాస్ట్ బౌలర్ అని చెప్పడంలో ఎటువంటి అతిశయోక్తి కాదు. ఖచ్చితంగా వేసే లైన్ అండ్ లెంగ్త్ బౌలింగ్ ని ఆడాలంటే  ఎటువంటి మేటి బ్యాట్స్మెన్ కి అయినా కత్తిమీద  సాములాంటిది అని చెప్పవచ్చు. ఇతడు 563 వికెట్లతో ఆస్ట్రేలియా తరుపున అత్యధిక వికెట్లు తీసిన బౌలరుగా నిలవడం మాత్రమే కాక టెస్టుల్లో ఐదవ స్థానంలో నిలిచాడు.

 

మ్యాచ్ లు             -   124
ఇన్నింగ్స్              -   243
వికెట్లు                  -   563
సగటు                  -   21.64
బెస్ట్(ఇన్నింగ్స్)     -   8/24
5 వికెట్లు               -   29 
10 వికెట్లు             -   3

6. కోట్ని వాల్ష్(వెస్ట్ ఇండీస్):

ఈ వెస్ట్ ఇండీస్ బౌలర్ 2000వ సంవత్సరంలో కపిల్ దేవ్ ని దాటి  టెస్టుల్లో ఎక్కువ వికెట్లు పడగొట్టినవాడుగా తన పేరును చరిత్రపుటల్లో  లిఖించుకున్నాడు. టెస్టుల్లో ఎంతో వేగంతో దీర్ఘకాల సమయం బంతులు సంధించగల అతి కొద్దిమందిలో ఒకడిగా గుర్తింపు తెచ్చుకున్నాడు. ఇతడు వెస్ట్ ఇండీస్ తరుపున అధిక వికెట్లు తీసిన రికార్డును తన పేరట నిలుపుకున్నాడు. ఇతడు తన కెరీర్లో కేవలం 132 మ్యాచుల్లో 519 వికెట్లు తీయడం గమనార్హం. 

మ్యాచ్ లు             -  132 
ఇన్నింగ్స్              -  242
వికెట్లు                  -  519
సగటు                  -  24.44 
బెస్ట్(ఇన్నింగ్స్)     -  7/37 
5 వికెట్లు               -  22
10 వికెట్లు             -  3

7. స్టువర్ట్ బ్రాడ్ (ఇంగ్లాండ్):

2007 టి20 వరల్డ్ కప్ లో స్టువర్ట్ బ్రాడ్ బౌలింగులో యువరాజ్ సింగ్ ఆరు బంతులకు ఆరు సిక్సర్లు కొట్టడం వలన మనకు బాగా సుపరిచితం అని చెప్పవచ్చు. కానీ ఇతడు టెస్టుల్లో తన సహచరుడైన అండర్సన్ తో కలిసి ఆరంభంలోనే కీలక  వికెట్లు పడగొట్టి ప్రత్యర్థి బ్యాట్సమన్ల నడ్డి విరచి తమ జట్టుకి గత దశాబ్దంగా ఎన్నో విజయాలు అందిస్తూ జట్టులో కీలక ఆటగాడిగా నిలిచాడు. ఇతడు టెస్టుల్లో 485 వికెట్లు తీసి అత్యధిక వికెట్లు సాధించిన వారి జాబితాలో ఏడవ స్థానంలో నిలిచాడు.

మ్యాచ్ లు            -   138
ఇన్నింగ్స్             -   254 
వికెట్లు                 -   485
సగటు                 -   28.50 
బెస్ట్(ఇన్నింగ్స్)     -  8/15
5 వికెట్లు               -  17
10 వికెట్లు             -  2

8. డేల్ స్టెయిన్(సౌత్ ఆఫ్రికా):

డేల్ స్టెయిన్ నిప్పులు చెరిగే బంతులతోపాటు ఖచ్చితమైన లైన్ అండ్ లెంగ్త్, స్వింగ్ బంతులు వేసి ప్రముఖ బ్యాట్సమెన్ ల వెన్నులో వణుకు పుట్టించేవాడు. ఇతను ప్రపంచ గొప్ప స్వింగ్ బౌలర్లలో ఒకరు. కేవలం 93 మ్యాచుల్లో 439 వికెట్లు తీసి టెస్టుల్లో సౌత్ ఆఫ్రికా తరుపున ఆడిన గొప్ప బౌలర్ గాను, టెస్టు క్రికెట్ చరిత్రలో 8వ స్థానంలోనూ నిలిచాడు. 

మ్యాచ్ లు             -   93
ఇన్నింగ్స్              -   171
వికెట్లు                  -   439
సగటు                  -   22.95 
బెస్ట్(ఇన్నింగ్స్)     -   7/51 
5 వికెట్లు               -   26
10 వికెట్లు             -    5 

9. కపిల్ దేవ్ (ఇండియా): 

కపిల్ దేవ్ ఎవరు ఊహించనివిధంగా  ఇండియాకి వరల్డ్ కప్ అందించిన సారథి, లెజెండ్. ఇండియా తరుపున ఆడిన గొప్ప ఫాస్ట్ బౌలర్ మరియు గొప్ప ఆల్ రౌండర్ అనడంలో మరో ప్రశ్న లేదని చెప్పవచ్చు. ఇతడు టెస్ట్ క్రికెట్ నుంచి రిటైర్డ్ అయ్యే సమయానికి అత్యధిక వికెట్లు తీసినవాడుగా ప్రథమ స్థానంలో  ఉండేవాడు. ప్రస్తుతం టాప్ 10 జాబితాలో  9వ స్థానానికి చేరుకున్నాడు. 

మ్యాచ్ లు             -  131
ఇన్నింగ్స్              -  227
వికెట్లు                  -  434
సగటు                  -  29.64 
బెస్ట్(ఇన్నింగ్స్)      -  9/83
5 వికెట్లు                -  23
10 వికెట్లు              -  2

10. రంగన హెరాత్ (శ్రీలంక):

మురళీధరన్ రిటైర్డ్ అయిన తరువాత శ్రీలంక స్పిన్ విభాగ బాధ్యతను రంగన హెరాత్  తన భుజాన వేసుకుని తన ప్రతిభతో నిలకడ గా వికెట్లు తీస్తూ జట్టు విజయాల కొరకు శ్రమించాడు. ఇతడు 93 టెస్టుల్లో 433 వికెట్లు తీసాడు. 

మ్యాచ్ లు             -  93
ఇన్నింగ్స్              -  170 
వికెట్లు                  -   433
సగటు                  -   28.07 
బెస్ట్(ఇన్నింగ్స్)      -  9/127
5 వికెట్లు               -   34
10 వికెట్లు             -   9 

టెస్ట్ క్రికెట్లో ఇంకా అనేకమంది గొప్ప బౌలర్లు ఉన్నప్పటికీ  అత్యధిక వికెట్లు తీసిన వారి టాప్ 10 జాబితాలో పైన  చెప్పబడినవారు నిలిచారు.

ధన్యవాదాలు. 
మీ అభిప్రాయాలు మాకు తెలియజేయగలరు.