Fastest centuries in onedays, అంతర్జాతీయ వన్డేలలో వేగవంతమైన శతకాలు చేసిన వారి టాప్ 10 జాబితా

వన్డేలు అనేవి టెస్ట్ మ్యాచులద్వారా రూపాంతరం చెందించబడి  ప్రేక్షకులను ఆకర్షించడానికి, అలరించడానికి  ఏర్పాటు చేయబడిన ఫార్మాట్. ఇందులో సెంచరీలు చేయడం అనేది కత్తిమీది సాములాంటిది. అందులోనూ ఒకవైపు  అంతర్జాతీయ వన్డేలలో సచిన్ తెందూల్కర్ లాంటివారు సెంచరీలు చెయ్యడం మాకు మంచి నీళ్లు తాగినంత సులభం అని చెప్పకనే చెప్తుంటే మరొకవైపు తమ అపార ప్రతిభతోను విధ్వంసకర బ్యాటింగ్ తోను మేటి బౌలర్లను కూడా  చీల్చి చెండాడి  వేగంగా సెంచరీలు నమోదు  చేసి క్రికెట్లో వారేమి చేయగలరో  నిరూపించినవారు ఎందరో వున్నారు. అందులో  టాప్ 10 ఫాస్టెస్ట్ సెంచురీలు చేసిన ఆటగాళ్ళని పరిశీలిద్దాము.

వన్డేలలో వేగవంతమైన శతకాలు చేసిన వారి టాప్ 10 జాబితా 

1. ఏ.బి డివిలియర్స్ (సౌత్ ఆఫ్రికా) vs వెస్ట్ ఇండీస్ (31 బంతుల్లో)

  

ఈ Mr.360 ప్రపంచ క్రికెట్లో బంతిని మైదానం నలువైపులా తరలించే వైవిధ్యమైన బ్యాటింగుతో  తనకంటూ ఒక ప్రత్యేక స్థానాన్ని ఏర్పరుచుకున్నాడు. తన విధ్వంసకర బ్యాటింగుతో 2015 వ సంవత్సరం వెస్ట్ ఇండీస్ తో జరిగిన మ్యాచులో ఆకలిగొన్న పులి ఏవిధంగా లేడిమీద విరుచుకుపడి దాడి చేస్తుందో అలాగే వెస్ట్ ఇండీస్ బౌలర్లమీద విరుచుకుపడి మైదానం నలువైపులా బంతిని బౌండరీ దాటించి కేవలం 31 బంతుల్లోనే సెంచురీ చేసి ఫాస్టెస్ట్ సెంచురీ చేసిన ఆటగాడిగా క్రికెట్ చరిత్రలో నిలిచిపోయాడు. ఇందులో మొత్తం 44 బంతులు ఆడిన డివిలియర్స్ 338.64 స్ట్రైక్ రేట్ తో 16 సిక్సర్లు, 9ఫోర్లతో 149 పరుగులు చేసి తన పరుగుల ఆకలిని వెస్ట్ ఇండీస్ బౌలర్లమీద తీర్చుకున్నాడు. అంతర్జాతీయ క్రికెట్లో 100 కంటే ఎక్కువ పరుగులు చేసినవారిలో అధిక స్ట్రైక్ రేట్ ఈ ఇన్నింగ్స్ దే కావడం ఒక విశేషం. 

2. కోరి అండర్సన్ (న్యూజిలాండ్) vs వెస్ట్ ఇండీస్ (36 బంతుల్లో)

source-cricketworld.com

కోరి అండర్సన్ హార్డ్ హిట్టింగ్ న్యూజిలాండ్ ఆల్ రౌండర్. ఇతడు 2014 వ సంవత్సరం వెస్ట్ ఇండీస్ తో జరిగిన ఒక వన్డేలో 17  సంవత్సరాలుగా వన్డేలలో ఫాస్టెస్ట్ సెంచరీని తన పేరట నిలుపుకున్న షాహిద్ ఆఫ్రిదిని వెనిక్కి నెట్టి కేవలం 36 బంతుల్లోనే సెంచరీ చేసి అభిమానులను అబ్బురపరిచాడు. ఈ మ్యాచులో వర్షం కారణంగా అంపైర్లు 21 ఓవర్లకు మ్యాచును కుదించగా  జెస్సి రైడర్ ఒకవైపు వెస్ట్ ఇండీస్ బౌలర్లను ఊచకోత కోస్తుంటే నాకేం తక్కువ అనుకున్నాడో ఏమో కేవలం 47 బంతుల్లో 6ఫోర్లు, 14 సిక్సర్లతో 131 పరుగులు చేసి ఒక సంవత్సరంపాటు (2015 వరకు ) వన్డేలలో ఫాస్టెస్ట్ సెంచరీ  రికార్డును తన పేరట లిఖించుకున్నాడు. ప్రస్తుతం ఇతడు వన్డే ఫాస్టెస్ట్ సెంచరీలలో రెండవ స్థానంలో నిలిచాడు. 

3. షాహిద్ ఆఫ్రిది(పాకిస్థాన్) vs శ్రీలంక (37 బంతుల్లో) 

షాహిద్ ఆఫ్రిది అంతర్జాతీయ పరిమిత ఓవర్ల క్రికెట్లో పాకిస్థాన్ తరుపున ఆడిన గొప్ప ఆల్ రౌండర్ అలాగే క్రికెట్లోనే విధ్వంసకర బ్యాట్సమెన్  అని చెప్పవచ్చు. ఇతడు 1996 లో తన కెరీర్ రెండవ మ్యాచ్ లోనే  శ్రీలంకపై ఆడిన తన మొదటి వన్డే ఇన్నింగ్స్ లో  కేవలం 37 బంతుల్లో 6 ఫోర్లు, 11 సిక్సర్లతో 102 పరుగులు చేసి తన కెరీర్ ఆరంభంలోనే క్రికెట్ అభిమానులు  మునుపెన్నడూ చూడని సుడిగాలి ఇన్నింగ్స్ తో ప్రేక్షకులకు కనువిందు కలుగజేసి అతను  బౌలర్లను ఎలా ఆడుకోపోతున్నాను అని తన కెరీర్ ఆరంభంలోనే  తెలియజేసాడు. ఈ సెంచరీ 2014 వరకు 17 సంవత్సరాలపాటు వన్డేలలోనే ఫాస్టెస్ట్ సెంచరీగా రికార్డులలో నిలిచిపోయింది. ప్రస్తుతం మూడవ స్థానంలో ఉంది. 

4. మార్క్ బౌచర్(సౌత్ ఆఫ్రికా) vs జింబాబ్వే(44 బంతుల్లో)

మార్క్ బౌచర్ అంతర్జాతీయ క్రికెట్లో విజయవంతమైన వికెట్ కీపర్ బ్యాట్సమన్లలో ఒకడు అన్నది మనకందరికి తెలిసిన విషయమే. ఇతడు  2006 లో జింబాబ్వేతో జరిగిన మ్యాచ్ లో కేవలం 44 బంతుల్లోనే 100 పరుగులు చేసి తన హిట్టింగ్ పవర్ ఏంటో ప్రపంచానికి చూపించాడు. ఈ సెంచరీతో మార్క్ బౌచర్ ప్రస్తుతం వన్డేలలో ఫాస్టెస్ట్ సెంచరీలు చేసినవారి జాబితాలో  నాల్గవ స్థానంలో నిలిచాడు.  

5. బ్రియాన్ లారా(వెస్ట్ ఇండీస్)vs బంగ్లాదేశ్ (45 బంతుల్లో)

బ్రియాన్ లారా క్రికెట్లోనే అత్యుత్తమ బ్యాట్సమన్లలో ఒకరు అనడంలో ఎటువంటి సందేహం లేదు. ఈ క్లాస్  బ్యాట్సమెన్ ఫాస్టెస్ట్ సెంచరీల జాబితాలో ఉండటం కొంతమందిని ఆశ్చర్యపరిచే విషయం అని చెప్పవచ్చు. ఈ వెస్ట్ ఇండీస్ లెజెండ్ 1999న బంగ్లాదేశ్ తో జరిగిన మ్యాచ్లో తన సహజసిద్దమైన బ్యాటింగ్ కు భిన్నంగా ఆరంభంనుంచి బౌలర్లమీద ఎదురుదాడి చేస్తూ కేవలం 45 బంతుల్లోనే తన సెంచరీ పూర్తిచేసి అప్పటికి వన్డేలలో రెండవ ఫాస్టెస్ట్ సెంచరీ చేసినవాడిగా  రికార్డులకెక్కాడు. ప్రస్తుతం ఈ ఇన్నింగ్స్ వన్డే క్రికెట్లో 5వ ఫాస్టెస్ట్ సెంచరీగా నిలిచింది.   

6. షాహిద్ ఆఫ్రిది(పాకిస్థాన్) vs ఇండియా ( 45 బంతుల్లో)

ఈ పాకిస్థానీ విధ్వంసకర ఆటగాడు తనదైన రోజున బౌలర్లకు చుక్కలు చూపించి చీల్చి చెండాడేస్తాడు. ఇతడు 2005వ సంవత్సరం భారత్ తో జరిగిన మ్యాచులో భారత్  నిర్దేశించిన 249 పరుగుల లక్ష్యాన్ని చేధించే క్రమంలో కేవలం 45 బంతుల్లో 10 ఫోర్లు, 9 సిక్సర్లు,  221.73 స్ట్రైక్ రేట్ తో 102 పరుగులు పూర్తిచేసి వన్డేలలో ఫాస్టెస్ట్ సెంచరీల జాబితాలో 6వ స్థానంలో నిలిచాడు. వన్డేలలో  టాప్ 10 ఫాస్టెస్ట్ సెంచరీల జాబితాలో ఈ సెంచరీ అఫ్రిదియొక్క రెండవ సెంచరీగా నిలవడం గమనార్హం.

7.జెస్సి  రైడర్(న్యూజిలాండ్) vs వెస్ట్ ఇండీస్ (46 బంతుల్లో)

జెస్సి రైడర్ న్యూజిలాండ్ తరుపున ప్రాతినిధ్యం వహించిన  బ్యాటింగ్ అల్ రౌండర్. ఇతడు 2014 వ సంవత్సరంలో వెస్ట్ ఇండీస్ మీద కోరి అండర్సన్ ఫాస్టెస్ట్ సెంచరీ చేసిన అదే మ్యాచ్ లో నేనేమి తక్కువ కాదన్నట్లు జెస్సి రైడర్ కూడా అండర్సన్ తో కలిసి  విండీస్ బౌలర్లమీద విరుచుకుపడి కేవలం 46 బంతుల్లోనే 12 ఫోర్లు, 5 సిక్సర్లతో సెంచరీ చేసి వన్డేలలో ఫాస్టెస్ట్ సెంచరీలు చేసినవారి టాప్ 10 జాబితాలో 7వ స్థానంలో నిలిచాడు. 

8. జొస్ బట్లర్(ఇంగ్లాండ్): vs పాకిస్థాన్ (46బంతుల్లో)

ఈ ఇంగ్లాండ్ వికెట్ కీపర్ బ్యాట్స్మన్ ప్రస్తుత జెనెరేషన్లో మోస్ట్ అటాక్కింగ్ బ్యాట్సమెన్ అని చెప్పడంలో ఎటువంటి సందేహం అక్కర్లేదు. ఇతడు 2015 లో పాకిస్తాన్తో దుబాయిలో జరిగిన మ్యాచులో 46 బంతుల్లోనే సెంచరీ చేసి తన బాదుడు ఎటువంటిదో పాకిస్థాన్ బౌలర్లకు రుచి చూపించాడు. జొస్ బట్లర్ ఈ మ్యాచులో నాల్గవ స్థానంలో దిగి 52 బంతుల్లోనే 10 ఫోర్లు, 8 సిక్సర్లతో 116 పరుగులు చేసి వీరవిహారం చేసాడు. జొస్ బట్లర్ ఈ సెంచురీతో వన్డేలలో ఫాస్టెస్ట్ సెంచరీ చేసినవారి  జాబితాలో 8 వ స్థానంలో నిలిచాడు.

9. సనత్ జయసూర్య(శ్రీలంక) vs పాకిస్థాన్( 48 బంతుల్లో)

సనత్ జయసూర్య పరిమిత ఓవర్ల గొప్ప ఆల్ రౌండర్, ఓ  విధ్వంసకర ఆటగాడు. ఇతడి బ్యాటింగును నిలువరించడానికి ప్రయత్నించి ఎంతో మంది బౌలర్లు విఫలమయ్యి  నిద్రలేని రాత్రులు గడిపిన సందర్భాలు ఎన్నో వున్నాయి. ఇతడు 1996లో సింగపూర్ వేదికగా పాకిస్తాన్తో జరిగిన మ్యాచ్ లో కేవలం 48 బంతుల్లోనే సెంచరీ చేసి అజహరుద్దీన్ పేరిట వున్న అప్పటి ఫాస్టెస్ట్ సెంచరీ రికార్డుని  బ్రేక్ చేసి తన పేరట లిఖించుకున్నాడు.కానీ ఆ రికార్డు ఎంతోకాలం నిలువలేదు. అఫ్రిది అదే సంవత్సరంలో  ఆ రికార్డును తన పేరట మార్చుకోవడం తెలిసినదే.  ఇప్పుడు ఈ సెంచురితో సనత్ జయసూర్య ఫాస్టెస్ట్ సెంచరీలు చేసిన వారిలో 9 వ స్థానంలో నిలిచాడు.  

10. జొస్ బట్లర్(ఇంగ్లాండ్): పాకిస్థాన్(50 బంతుల్లో)

జొస్ బట్లర్ పాకిస్తాన్తో 2019 వ సంవత్సరం జరిగిన మ్యాచ్ లో కేవలం 50 బంతుల్లోనే సెంచరీ చేసి తన  బ్యాటింగుతో పాకిస్థాన్ బౌలర్లకు చుక్కలు చూపించి మరొకసారి వేగవంతమైన సెంచరీ చేసినవాడుగా నిలిచి ప్రపంచ క్రికెట్ అభిమానులను అలరించాడు. ఈ హండ్రెడ్ తో వన్డేల్లో  టాప్ 10 ఫాస్టెస్ట్ సెంచరీల జాబితాలో పదవ స్థానంలో నిలిచాడు.  

జొస్ బట్లర్ తో పాటు ఐర్లాండ్కు చెందిన కెవిన్ ఒబ్రెయిన్ కూడా 2011 వరల్డ్ కప్లో ఇంగ్లాండుతో జరిగిన మ్యాచులో  కేవలం 50 బంతుల్లోనే సెంచరీ చేసి అందరిని ఆశ్చర్యపరిచాడు.  

వన్డేలలో ఫాస్టెస్ట్ హండ్రెడ్ కొట్టినవారి టాప్ 10 జాబితా  ఇది. వీరితోపాటు వేగవంతమైన శతకాలు చేసినవారు ఎంతోమంది వున్నారు. 

ధన్యవాదాలు 

మీ అభిప్రాయాలు కామెంట్లరూపంలో తెలియజేయగలరు.