టీ 20లలో ఒక ఇన్నింగ్సులో అత్యధిక పరుగులు చేసిన టాప్ 10 టీమ్ లు,Highest Innings Total in T20s,

టీ 20లు అనగానే స్టేడియం కప్పును తాకే భారీ సిక్సులు, తరచుగా ఫీల్డర్లకు  అందకుండా బౌండరీ దాటే ఫోర్లు, గాల్లోకి ఎగిరి బంతిని ఒడిసి పట్టుకునే ఫీల్డర్ల విన్యాసాలు, బ్యాట్సమన్ల వీర బాదుడు, బ్యాట్సమన్లను నిలువరించాలని వేసే వైవిధ్యమైన బంతులు, వీటితో పాటు మైదానం దద్దరిల్లే ప్రేక్షకుల ఆర్భాటాలు, సంబరాలు మన కళ్ళ ముందు కనిపిస్తాయి. అయితే టి 20 చరిత్రలోనే ఒక ఇన్నింగ్సులో అత్యధిక పరుగులు చేసి టాప్ 10 లో నిలిచిన జట్లను చూద్దాము. 

10. ఇండియా vs వెస్ట్ ఇండీస్, 244/4 

2016 వ సంవత్సరంలో ఇండియాకి వెస్ట్ ఇండీస్ కి జరిగిన ఈ మ్యాచ్ అంతర్జాతీయ టి 20 లలోనే ఒక ప్రత్యేక స్థానాన్ని సంపాదించింది. టి 20 లలో  రెండు ఇన్నింగ్సులు కలిపి ఒక మ్యాచులో అత్యధిక పరుగులు నమోదయిన మ్యాచ్  గా రికార్డులకెక్కింది. ఈ  మ్యాచులో టాస్ గెలిచిన ఇండియా వెస్ట్ ఇండీస్ ను బ్యాటింగ్ కు ఆహ్వానించింది.  వెస్ట్ ఇండీస్  245 భారీ స్కోర్ చేయడంతో దానిని ఛేదించే క్రమంలో ఇండియా 244 పరుగులు మాత్రమే చేసి 1 పరుగు తేడాతో ఓటమి పాలయ్యింది. ఇందులో రోహిత్ శర్మ 28 బంతుల్లో4 ఫోర్లు, 4 సిక్సర్లతో 62 పరుగులు చేసి తన సొగసైన షాట్లతో రెచ్చిపోగా, కె ఎల్ రాహుల్ తన మొదటి సెంచరీ చేసి కేవలం 51 బంతుల్లో 12 ఫోర్లు, 5సిక్సర్లతో 110 పరుగులు చేసి నాటౌట్ గా నిలవడంతో 244 పరుగులతో ఇండియా అత్యధిక పరుగులు చేసిన టీంలలో 10 వ స్థానంలో నిలిచింది. 

9. వెస్ట్ ఇండీస్ vs ఇండియా , 245/6

వెస్ట్ ఇండీస్ జట్టు టి 20 లలో ఎంత ప్రమాదకరమైనదో మనకు తెలుసు. 2016 లో ఇండియా, వెస్ట్ ఇండీస్ మధ్య జరిగిన మ్యాచులో మొదట బ్యాటింగ్ చేసిన వెస్ట్ ఇండీస్ కు ఓపెనర్లుగా వచ్చిన ఎవిన్ లూయిస్, జాన్సన్ చార్లెస్  అదిరిపోయే ఆరంభంతో ఇండియన్ బౌలర్లను తుత్తునియలు చేసి పరుగుల వరద పారించారు. స్టువర్ట్ బిన్నీ వేసిన ఇన్నింగ్స్  11వ ఓవర్లో ఎవిన్ లూయిస్ ఏకంగా 5 సిక్సులు కొట్టి 32 పరుగులు పిండుకుని టి20లలో  తనెంత ప్రమాదకర ఆటగాడో మరోసారి తెలియజేసాడు. ఈ మ్యాచులో జాన్సన్ చార్లెస్ 33 బంతుల్లో 7 సిక్సర్లు, 6ఫోర్లతో 79 పరుగులు చేసి ఔట్ కాగా,  ఎవిన్ లూయిస్ కేవలం 49 బంతుల్లో 9సిక్సులు, 5 ఫోర్లతో 100 పరుగులు చేసి జడేజా వేసిన 16 వ ఓవర్లో పెవిలియన్ చేరాడు. లూయిస్ కు ఇది టి 20లలో మొదటి సెంచరీ కావడం విశేషం. ఈ మ్యాచులో వెస్ట్ ఇండీస్ 1 పరుగు తేడాతో విజయం సాధించింది. వెస్ట్ ఇండీస్ విజయంలో కీలకపాత్ర పోషించిన ఎవిన్ లూయిస్ కు మాన్ అఫ్ ది మ్యాచ్ అవార్డు లభించింది. టీ 20లలో అత్యధిక పరుగులు చేసిన టీమ్ లలో 245 పరుగులతో 9 వ స్థానంలో నిలిచింది. 

8. ఆస్ట్రేలియా vs న్యూజిలాండ్ 245/5

2018 వ సంవత్సరంలో ఆస్ట్రేలియా, న్యూజిలాండ్ కు మధ్య జరిగిన మ్యాచ్ లో టాస్ గెలిచి మొదట బ్యాటింగ్ కు దిగిన న్యూజిలాండ్ కు మార్టిన్ గప్టిల్, కొలిన్ మున్రో అదిరిపోయే ప్రారంభం ఇచ్చి మొదటి వికెట్కు ఏకంగా 10.4 ఓవర్లలోనే 132 పరుగులు చేసారు. న్యూజిలాండ్ బ్యాటింగ్ లో మార్టిన్ గప్టిల్ 54 బంతుల్లో 6ఫోర్లు, 9 సిక్సర్లతో 105 పరుగులు చేయగా టి 20లలో అత్యధిక సెంచరీల జాబితాలో 3 సెంచరీలతో 2వ స్థానంలో వున్నకొలిన్ మున్రో 33 బంతుల్లో 6ఫోర్లు, 6సిక్సర్లతో 76 పరుగులు చేయడంతో 20 ఓవర్లలో 243 పరుగులు చేసింది. న్యూజిలాండ్ నిర్ధేశించిన 244 పరుగుల లక్ష్యాన్ని చేధించే క్రమంలో ఆస్ట్రేలియాకు మంచి ఓపెనింగ్ లభించింది. డేవిడ్ వార్నర్, షార్ట్ ఏకంగా 121 పరుగులు భాగస్వామ్యాన్ని నెలకొల్పారు. వార్నర్ 24 బంతుల్లో 4 ఫోర్లు, 5 సిక్సర్లతో 59 పరుగులు చేయగా, షార్ట్ 44 బంతుల్లో 8 ఫోర్లు, 3 సిక్సర్లతో  76 పరుగులు చేసి అవుట్ అయ్యారు. చివర్లో ఆరన్ ఫించ్, మాక్సవెల్ విజృంభించడంతో మరో 7 బంతులు మిగిలి ఉండగానే 245 పరుగులు చేసి  లక్ష్యాన్ని ఛేదించి టి 20లలో అత్యధిక పరుగులు చేధించిన రికార్డు తమ పేరట నిలుపుకున్నారు. ఆస్ట్రేలియా 245 పరుగులతో టీ 20లలో అత్యధిక పరుగులు చేసిన టీమ్ లలో 8 వ స్థానంలో నిలిచింది.  

7.ఆస్ట్రేలియా vs ఇంగ్లాండ్  248/6

2013 లో ఆస్ట్రేలియా ఇంగ్లాండ్ ల మధ్య జరిగిన మ్యాచులో టాస్ గెలిచిన ఇంగ్లాండ్ ఆస్ట్రేలియాను బ్యాటింగ్ కు ఆహ్వానించింది. డేవిడ్ వార్నర్ ఆరంభంలోనే అవుటయ్యినప్పటికీ దీనినే అదునుగా తీసుకున్న ఆరోన్ ఫించ్ తాను బాదడం మొదలెడితే ఎలా ఉంటుందో ఇంగ్లాండ్ బౌలర్లకు  చూపించాడు. ఫించ్ బాదుడుకి ఇంగ్లాండ్ బౌలర్లనుంచి ఎటువంటి సమాధానం  లేదనే చెప్పాలి. గ్రౌండ్ నలువైపులా బంతిని బలంగా బాదుతూ తన మొట్టమొదటి అంతర్జాతీయ టి 20 సెంచరీ చేసాడు. అలాగే కేవలం 63 బంతుల్లో 11ఫోర్లు,14 సిక్సర్లతో 156 పరుగులు చేసి అప్పటికి టి 20లలో అత్యధిక వ్యక్తిగత పరుగులు చేసిన వాడిగా నిలిచాడు. దీంతో ఆస్ట్రేలియా 248 పరుగులు చేసింది. ఇంగ్లాండ్ 248  పరుగుల లక్ష్యాన్ని ఛేదించే క్రమంలో జో రూట్ మాత్రమే 90 పరుగులతో రాణించడంతో 209 పరుగులు చేసి 39 పరుగుల తేడాతో ఓటమి పాలయ్యింది. ఈ మ్యాచులో ఆస్ట్రేలియా 248 పరుగులతో టీ 20లలో అత్యధిక పరుగులు చేసిన టీమ్ లలో 7 వ స్థానంలో నిలిచింది. 

6. స్కాట్లాండ్ vs నెదర్లాండ్స్  252/3

2019 సెప్టెంబర్ లో ఐర్లాండ్ ముక్కోణపు టీ20 టోర్నీలో స్కాట్లాండ్, నెదర్లాండ్స్ మధ్య జరిగిన మ్యాచ్ లో మొదట బ్యాటింగ్ చేసిన స్కాట్లాండ్ కు ఓపెనర్లగా వచ్చిన జార్జ్ మున్సే, కెప్టెన్ కొయెట్జెర్ ద్వారా 200 పరుగుల భాగస్వామ్యంతో ఘనమైన ఆరంభం లభించింది ఈ భాగస్వామ్యం టి20లలో 3వ అత్యధిక భాగస్వామ్యం. వీరిద్దరూ ఏ ఒక్క బౌలర్ ను విడిచిపెట్టకుండా బౌలర్లు బెంబేలెత్తిపోయేలా తమ బ్యాటింగ్ విశ్వరూపాన్ని చూపారు. ఇందులో మాక్స్ ఒడౌడ్ వేసిన ఒక ఓవర్లో అయితే మున్సే ఏకంగా నాలుగు సిక్సులు, రెండు ఫోర్లతో 32 పరుగులు సాధించాడు, ఇందులో మున్సే 56 బంతుల్లో 14 సిక్సులు, 5 ఫోర్లతో 127 పరుగులు చేసి నాటౌట్ గా నిలువగా  కొయెట్జెర్ 50 బంతుల్లో 5 సిక్సులు, 11 ఫోర్లతో 89 పరుగులు చేయడంతో 20 ఓవర్లకు 252 పరుగులు చేసారు. అయితే లక్ష్యచేధనలో నెదర్లాండ్స్  కెప్టెన్ సీలర్ మాత్రం 96 పరుగులతో ఒంటరిపోరాటం చేయడంతో 194 పరుగులు మాత్రమే చేసి 58 పరుగులతో ఓటమి పాలయ్యింది. ఈ మ్యాచులో స్కాట్లాండ్ వారు చేసిన 252 పరుగులు టీ20లలోనే 6వ అత్యధిక టీమ్ స్కోర్ కావడం విశేషం. 

5. ఇండియా vs శ్రీలంక 260/5

2017 న ఇండియా శ్రీలంకతో ఆడిన మ్యాచ్ లో టాస్ ఓడి మొదట బ్యాటింగ్ చేసింది. ఓపెనర్లుగా వచ్చిన రోహిత్ శర్మ, కె ఎల్ రాహుల్ శ్రీలంక బౌలర్లను చితక్కొట్టి మొదటి వికెట్కు 165 పరుగులు జోడించి ఇండియా తరుపున  టి20లలో అత్యధిక భాగస్వామ్యాన్ని నెలకొల్పి భారత్ 260 పరుగులు చేయడంలో కీలకపాత్ర పోషించారు. ఇందులో రోహిత్ 35 బంతుల్లో సెంచరీ చేసి అంతర్జాతీయ టీ20లలో జాయింట్ ఫాస్టెస్ట్ సెంచరీ చేసిన వాడిగా నిలిచాడు. రోహిత్ శర్మ 43 బంతుల్లో 12 ఫోర్లు, 10 సిక్సులతో 118 పరుగులు చేసి 13వ ఓవర్లో ఔట్ అయ్యాడు, రాహుల్ 49 బంతుల్లో 5 ఫోర్లు, 8 సిక్సులతో 89 పరుగులు చేసి వీరెందుకు టీ20 లలో మేటి ఆటగాళ్ళో ప్రపంచానికి తెలియజేసారు. శ్రీలంక చేసింగ్ లో కుశాల్ పెరేరా 77 పరుగులతో  రాణించడంతో కేవలం 172 పరుగులు మాత్రమే చేసి ఆల్ ఔట్ అయ్యింది. భారత్ చేసిన 260 పరుగులు టి 20లలో భారత్ కు అత్యధిక స్కోర్ మాత్రమే కాక టీ20లలోనే 5వ అత్యధిక టీమ్ స్కోర్ గా నిలిచింది. 

4. శ్రీలంక vs కెన్యా 260/6     

    

2007 వ సంవత్సరం సౌత్ ఆఫ్రికాలో జరిగిన మొట్టమొదటి టి 20 వరల్డ్ కప్ లో 8వ మ్యాచ్ శ్రీలంక, కెన్యా మధ్య జరిగింది. మొదట బ్యాటింగ్ కు దిగిన  శ్రీలంక బ్యాట్సమన్లు పసికూన కెన్యా బౌలింగును చీల్చి చెండాడి ఒక ఆట ఆడుకున్నారు. టిఎం ఓడాయో ఒక్కడు మినహాయించి మిగిలిన బౌలర్లలో ప్రతి ఒక్కరు ఓవర్ కి 12 కు పైగా పరుగులు సమర్పించుకున్నారు. సనత్ జయసూర్య తన విధ్వంసకర బ్యాటింగ్ తో మరోసారి జూలు విదిల్చిన సింహంలాగా పంజా విసిరి 44 బంతుల్లో 88 పరుగులు చేసాడు. కెప్టెన్ జయవర్దనే కేవలం 27 బంతుల్లోనే 9ఫోర్లు, 2 సిక్సులతో 65 పరుగులు చేసాడు. ఆఖర్లో జెహాన్ ముబారక్ 13 బంతుల్లోనే 3 ఫోర్లు, 5 సిక్సులతో 46 పరుగులు చేసి మంచి ఫినిషింగ్ ఇవ్వడంతో శ్రీలంక 260 పరుగులు చేసింది. 261 పరుగుల ఛేదన ప్రారంభించిన కెన్యా కేవలం 88 పరుగులకే కుప్పకూలడంతో శ్రీలంక 172 పరుగుల తేడాతో విజయం సాధించింది. అప్పట్లో టి 20లలో ఈ 260 పరుగులే అత్యధికం. ఇది ప్రస్తుతం టీ20లలోనే 4వ అత్యధిక టీమ్ స్కోర్ కావడం విశేషం. 

3. ఆస్ట్రేలియా vs శ్రీలంక 263/3 

2016 వ సంవత్సరంలో ఆస్ట్రేలియా, శ్రీలంక మధ్య జరిగిన మ్యాచ్ లో మొదట బ్యాటింగ్ ప్రారంభించిన బలమైన బ్యాటింగ్ లైనప్ ఉన్న ఆస్ట్రేలియాకు 5వ ఓవర్ లోనే వార్నర్ రూపంలో మొదటి వికెట్ పడింది. వార్నర్ 28, ఖవాజా 36, ట్రావిస్ హెడ్ 45 పరుగులు చేయగా గ్లెన్ మాక్సవెల్ మాత్రం తనకు బాదడం ఒక్కటే తెలుసు అన్నట్లు శ్రీలంక బౌలర్లను ఉతికి ఆరేసి కేవలం 65 బంతుల్లోనే 14 ఫోర్లు, 9 సిక్సులతో 145 పరుగులు చేసి నాట్ ఔట్ గా నిలిచాడు. దానితో ఆస్ట్రేలియా తన 20 ఓవర్లలో 3 వికెట్లకు 263 పరుగులు చేయగలిగింది. ఛేదనలో శ్రీలంక కెప్టెన్ చండీమల్ 58, కపుగెదెర 43 పరుగులు చేయడంలో 178 పరుగులు చేసి ఘోర పరాభవం నుంచి తప్పించుకుంది. ఈ మ్యాచులో ఆస్ట్రేలియా చేసిన 263 పరుగులు ప్రస్తుతం టి 20లలోనే మూడవ అత్యధికమైనది.   

2. చెక్ రిపబ్లిక్ vs టర్కీ 278/4 

చెక్ రిపబ్లిక్, టర్కీ రెండు దేశాలు క్రికెట్లో అంతగా ప్రాచుర్యం పొందని దేశాలయినప్పటికీ 2019 ఆగష్టు 30 వ తేదిన వీరి మధ్య జరిగిన మ్యాచులో ప్రపంచ రికార్డు నెలకొల్పబడింది. టాస్ గెలిచి బ్యాటింగ్ ఎంచుకున్న చెక్ రిపబ్లిక్ కు ఓపెనింగ్ చేసిన గోరి, పొక్రియాల్ 70 పరుగులు భాగస్వామ్యాన్ని నెలకొల్పారు. ఇందులో పొక్రియాల్ 52 బంతుల్లో 79 పరుగులు చేసి అవుట్ అయ్యాడు. అయితే 5వ స్థానంలో బ్యాటింగ్ కు వచ్చిన ఎస్ విక్రమశేఖర మాత్రం ఒక మెరుపు బ్యాటింగ్ తో 36 బంతుల్లోనే 8 ఫోర్లు, 10 సిక్సులతో సెంచరీ చేసి 104 పరుగులు చేసి నాట్ అవుట్ గా నిలిచాడు. చెక్ రిపబ్లిక్ కు అంతర్జాతీయ టి 20లలో ఇదే మొదటి సెంచరీ కావడం విశేషం. 279 పరుగుల లక్ష్యాన్ని చేధించే క్రమంలో టర్కీ కేవలం 8.3 ఓవర్లలోనే 21 పరుగులకే చాప చుట్టేయడంతో 257 పరుగుల ఘోర పరాజయాన్ని చవిచూసింది. ఈ 21 పరుగులే టీ20 క్రికెట్లో అత్యల్ప టీమ్ స్కోర్ గా చెత్త రికార్డులలో నిలిచింది. టర్కీ బ్యాటింగ్ లో 8 మంది సున్నా కే పరిమితం కాగా ఎం సెర్ట్ మాత్రమే 12 పరుగులతో రెండంకెల స్కోర్ చేయగలిగాడు. 278 పరుగులు అంతర్జాతీయ టి 20 క్రికెట్లోనే ఆప్ఘనిస్థాన్  తో కలిసి అత్యధిక స్కోర్ గా నిలిచింది. 

1. ఆఫ్ఘానిస్తాన్ vs ఐర్లాండ్ 278/3 

ఆఫ్ఘనిస్తాన్ దేశం అంతర్జాతీయ క్రికెట్ కి కొత్త అయినప్పటికీ వారు శరవేగంగా ఎదిగి క్రికెట్లో తామేమీ తక్కువ కాదు అని బలమైన జట్లకు కూడా షాక్ ఇచ్చి  మట్టికరిపించిన సందర్భాలు వున్నాయి. 2019 వ సంవత్సరంలో ఐర్లాండ్ తో జరిగిన మ్యాచ్ లో ఆఫ్ఘానిస్తాన్ జట్టు టి 20లలో రికార్డుల మోత మోగించింది.  మొదట బ్యాటింగ్ చేసిన ఆఫ్ఘానిస్తాన్ కు హజ్రతుల్లా జజాయ్, ఉస్మాన్ ఘని మొదటి వికెట్కు ఏకంగా 236 పరుగుల భాగస్వామ్యాన్ని నెలకొల్పి టి 20లలోనే అత్యధిక భాగస్వామ్యాన్ని నెలకొల్పారు. ఈ మ్యాచులో హజ్రతుల్లా జజాయ్ కేవలం 62 బంతుల్లో 11 ఫోర్లు, 16సిక్సులతో 162 పరుగులు చేసి నాట్ ఔట్ గా నిలిచాడు, ఉస్మాన్ ఘని 48 బంతుల్లో 73 పరుగులు చేసి ఔట్ అయ్యాడు. దాంతో ఆఫ్ఘానిస్తాన్ 3 వికెట్లకు 278 పరుగులు చేసింది. జజాయ్ టి 20లలో ఒక ఇన్నింగ్సులో 16 సిక్సులతో ఎక్కువ సిక్సులు కొట్టినవాడుగా రికార్డు నెలకొల్పాడు. అయితే పాల్ స్టిర్లింగ్ ఒక్కడే 91 పరుగులతో రాణించడంతో ఐర్లాండ్ భారీ లక్ష్యాన్ని చేధించలేక 194 పరుగులు మాత్రమే చేసి 84 పరుగుల తేడాతో ఓటమి పాలయ్యింది. ఈ మ్యాచులో ఆఫ్గాన్స్ చేసిన 278 పరుగులే అంతర్జాతీయ టి 20లలో అత్యధికమైనది. 

ధన్యవాదాలు 

మీ అభిప్రాయాలు కామెంట్లరూపంలో తెలియజేయగలరు.