వన్డే క్రికెట్లో ఒక ఇన్నింగ్స్ లో అత్యధిక పరుగులు చేసిన టాప్ 10 జట్లు ,Highest innings score in ODI,highest innings total in oneday internationals

వన్డే క్రికెట్లో  రెండు దశాబ్దాలకు ముందు 300 పరుగులు చేయడం అనేది చాలా అరుదుగా జరిగేది. ఐసీసీ ప్రేక్షకులను క్రికెట్ వైపు ఆకర్షించడానికి, వారి ఆదరణ పొందడానికి  క్రికెట్లో మార్పులు చేర్పులు చేస్తున్న కొలది వన్డేలలో  బ్యాటింగ్ పవర్ ప్లేలు రావడం అందులో  ఫీల్డ్ రెస్ట్రిక్షన్స్ ఉండడం అనేది   బౌలర్లను కాస్త ఇబ్బంది పెట్టిన విషయమైనప్పటికీ  బ్యాట్సమన్ల మనుగడమాత్రం కాస్త సులభతరమయ్యింది. అలాగే  టీ 20 పుణ్యమా అని ఆటగాళ్లు దూకుడుగా ఆడతుండడంతో గత దశాబ్ద కాలంనుండి అన్ని దేశాలు తరచూ 300 పరుగులు చేస్తూ అడపాదడపా 400 పరుగులు కూడా చేస్తూ వస్తున్నాయి. 500 పరుగులు మొదట ఎవరు చేస్తారా అని ఎదురుచూస్తున్న వారిలో మనం కూడా వున్నాము. అయితే వన్డేలలో భారీ పరుగులు చేయడమనేది అంత సులభమైన పని కాదు. కానీ బ్యాట్సమన్ల సమిష్టి కృషితో అందరూ ఒకేసారి చెలరేగి ఆడినప్పుడు భారీ పరుగులు చేయడం  జరుగుతూ ఉంటుంది. ఇప్పుడు మనం అంతర్జాతీయ వన్డేలలో  ఆ విధంగా చెలరేగి ఆడి ఒక ఇన్నింగ్స్ లో అత్యధిక పరుగులు చేసిన వారి టాప్ 10 స్కోర్లు చూద్దాము.

వన్డే క్రికెట్లో ఒక ఇన్నింగ్స్ లో అత్యధిక పరుగులు 

    

10.ఇంగ్లాండ్ vs వెస్ట్ ఇండీస్ 418/6

2019 ఫిబ్రవరి 27 న ఇంగ్లాండ్ వెస్ట్ ఇండీస్ కు మధ్య జరిగిన మ్యాచులో టాస్ గెలిచిన వెస్ట్ ఇండీస్ మొదట ఫీల్డింగ్ ఎంచుకుని ఇంగ్లాండ్ ను బ్యాటింగ్ కు ఆహ్వానించింది. ఓపెనర్లుగా వచ్చిన జానీ బెయిర్ స్టో 43 బంతుల్లో 4 ఫోర్లు, 4సిక్సులతో 56 పరుగులతో ఔట్ కాగా, అలెక్స్ హేల్స్ 73 బంతుల్లో 8 ఫోర్లు, 2సిక్సులతో  82 పరుగులు చేసి ఔటయ్యాడు. వీరిద్దరూ మొదటి  వికెట్కు 100 పరుగులు జోడించి ఎప్పటిలాగే భారీ పరుగులు చేయడానికి పునాదులు వేయడంతో తరవాత వచ్చిన ఇయాన్ మోర్గాన్, జొస్ బట్లర్ శరవేగంగా  బ్యాటింగ్ చేస్తూ స్కోరుబోర్డును పరిగెత్తించారు. దీంతో ఇయాన్ మోర్గాన్ 88 బంతుల్లో 8 ఫోర్లు, 6 సిక్సులతో 103 పరుగులు చేసి తన కెప్టెన్ ఇన్నింగ్స్ తో ఆకట్టుకోగా, జొస్ బట్లర్ మాత్రం వెస్ట్ ఇండీస్ బౌలర్లను వీరబాదుడు బాది  కేవలం 77 బంతుల్లోనే 13 ఫోర్లు, 12 సిక్సులతో 150 పరుగులు చేసి ఇన్నింగ్స్ చివరి బంతికి అవుట్ అయ్యాడు. ఇంగ్లాండ్ చివరి 10 ఓవర్లలో 154 పరుగులు చేసిందంటే వారి బాదుడు ఎలా వున్నదో అర్ధమవుతుంది. దీంతో ఇంగ్లాండ్ తమ 50 ఓవర్లలో 6 వికెట్లకు 418 పరుగులు చేయగలిగింది. ఈ 418 పరుగులు వన్డేలలోనే ఒక ఇన్నింగ్స్ లో అత్యధిక పరుగులు చేసిన వాటిలో 10 వ స్థానంలో నిలవడం మాత్రమే కాక ఇదే మ్యాచులో వెస్ట్ ఇండీస్ 389 పరుగులు చేయడంతో ఈ మ్యాచ్లో రెండు ఇన్నింగ్సులు కలిపి 807 పరుగులు నమోదయ్యాయి. వన్డేలలోనే ఒక మ్యాచులో అత్యధిక పరుగులు  నమోదయిన వాటిలో మూడవ స్థానంలో నిలిచి రికార్డు నిలుకొల్పబడింది. 

9. ఇండియా vs వెస్ట్ ఇండీస్ 418/5 

2011వ సంవత్సరం ఇండియా వరల్డ్ కప్ గెలిచి చరిత్ర సృష్టించిన సంవత్సరం. ఈ సంవత్సరంలో వెస్ట్ ఇండీస్ తో జరిగిన మ్యాచులో టాస్ గెలిచిన భారత్ కెప్టెన్ సెహ్వాగ్ బ్యాటింగ్ ఎంచుకున్నాడు. ఓపెనర్లుగా వచ్చిన సెహ్వాగ్, గంభీర్ ఇద్దరు మొదటి వికెట్కు 176 పరుగుల భాగస్వామ్యాన్ని నెలకొల్పిన తరువాత గంభీర్ 67 పరుగులకు ఔటయ్యాడు. అయితే షరా మాములుగానే దూకుడుకు మారుపేరైన సెహ్వాగ్ తనదైన శైలిలో ఆరంభంనుంచి అదరకొట్టి బంతిని బౌండరీకి చెదరగొట్టి వెస్ట్ ఇండీస్ బౌలర్లను బెదరకొట్టాడు. సెహ్వాగ్ కేవలం 149 బంతుల్లోనే 25 ఫోర్లు, 7సిక్సులతో 219 పరుగులు చేసి వన్డే క్రికెట్ చరిత్రలోనే డబల్ సెంచరీ చేసిన రెండవ ఆటగాడిగాను మొదటి కెప్టెన్ గాను అప్పటికి అత్యధిక పరుగులు చేసిన వాడుగాను నిలిచాడు. ఇదే మ్యాచులో సురేష్ రైనా కూడా 44 బంతుల్లో 6ఫోర్లతో 55 పరుగులు చేయడంతో భారత్ 50 ఓవర్లలో 5 వికెట్లకు 418 పరుగులు చేసింది. భారత్ 400 పరుగుల మార్క్ దాటడం ఇది  నాల్గవసారి. వెస్ట్ ఇండీస్ 419 పరుగుల లక్ష్యాన్ని చేధించే క్రమంలో కేవలం 265 పరుగులకే ఆల్ అవుట్ అయ్యింది. దినేష్ రామ్ దిన్ మాత్రమే 96 రన్స్ కొట్టి పర్వాలేదనిపించాడు. ఈ మ్యాచులో ఇండియా చేసిన  418 పరుగులు వన్డేల్లో అత్యధిక పరుగులు చేసిన టాప్ 10 జాబితాలో 9వ స్థానంలో నిలిచింది.

8.సౌత్ ఆఫ్రికా vs  జింబాబ్వే 418/5

2006 సెప్టెంబర్ 20 న  సౌత్ ఆఫ్రికాకు జింబాబ్వేకు మధ్య సిరీస్ మూడవ వన్డే జరిగింది. ఈ మ్యాచ్లో బలమైన బ్యాటింగ్, బౌలింగ్ లైనప్ వున్నసౌత్ ఆఫ్రికాకు జింబాబ్వే  ఏసమయంలోను పోటీ ఇవ్వలేకపోయిందనే చెప్పాలి. మొదట బ్యాటింగ్ చేసిన సౌత్ ఆఫ్రికాకు ఓపెనర్లుగా వచ్చిన బొస్మాన్ 70 బంతుల్లో 11 ఫోర్లు, 3 సిక్సులతో  80, అల్విరో పీటర్సన్ 74 బంతుల్లో 10 ఫోర్లు, 1సిక్సుతో  80 పరుగులు చేసి మంచి ఆరంభాన్ని ఇచ్చి ఔటయ్యారు. అలాగే కెప్టెన్ జాక్వస్ కలిస్ 59 బంతుల్లో 5ఫోర్లతో 50 పరుగులు చేసాడు. మనం  ఎప్పుడూ వికెట్ కీపింగ్ ప్రతిభ గురించి మాట్లాడే వికెట్ కీపర్ బ్యాట్సమన్  మార్క్ బౌచర్ మాత్రం కేవలం 44 బంతుల్లోనే సెంచరీ చేసి రికార్డు నెలకొల్పాడు. ఈ సెంచరీ వన్డే క్రికెట్లో నాల్గవ వేగవంతమైన సెంచరీగా  నిలిచింది. మార్క్ బౌచర్ ఈ ఇన్నింగ్సులో మొత్తం 68 బంతులాడి 8ఫోర్లు, 10 సిక్సులతో 147 పరుగులు చేసి నాట్ అవుట్ గా నిలిచాడు. దాంతో సౌత్ ఆఫ్రికా 5 వికెట్లను కోల్పోయి 418 పరుగులు చేసింది. 419 పరుగుల భారీ లక్ష్యాన్ని చేధించే క్రమంలో జింబాబ్వే ఓపెనర్ డాఫిన్ మాత్రమే 88 పరుగులతో రాణించడంతో 50 ఓవర్లలో 4 వికెట్లకు 247 పరుగులు చేసి 174 పరుగుల తేడాతో ఓటమి చవిచూసింది. ఈ మ్యాచులో సౌత్ ఆఫ్రికా చేసిన 418 పరుగులు వన్డేలలోనే ఒక ఇన్నింగ్సులో అత్యధిక పరుగుల జాబితాలో 8వ స్థానంలో నిలిచింది. 

7. ఆస్ట్రేలియా vs  సౌత్ ఆఫ్రికా 434/4       

2006 మార్చ్ 12 న  ఆస్ట్రేలియా, సౌత్ ఆఫ్రికా మధ్య జరిగిన ఈ  మ్యాచ్ వన్డే క్రికెట్ చరిత్రలోనే చిరకాలం నిలిచిపోయే మ్యాచ్. ఈ మ్యాచులో టాస్ గెలిచి బ్యాటింగ్ ప్రారంభించిన ఆస్ట్రేలియాకు కటిచ్, గిలిక్రిస్ట్ 97 పరుగుల మంచి ఆరంభాన్నిచ్చారు. గిలిక్రిస్ట్ 44 బంతుల్లో 9 ఫోర్లతో 55 పరుగులు చేసి అవుట్ అవ్వగా సైమన్ కటిచ్ 90 బంతుల్లో 9 ఫోర్లు, 1సిక్సుతో 79 పరుగులు చేసి అవుట్ అయ్యాడు. రికీ పాంటింగ్ గొప్ప కెప్టెన్ గా మనకు తెలుసు. ఈ మ్యాచులో పాంటింగ్ తన కెరీర్ లోనే బెస్ట్ ఇన్నింగ్స్ ఆడాడు. ఇతడు కేవలం  105 బంతుల్లో 13 ఫోర్లు, 9సిక్సులతో 164 పరుగులు చేసి 48 వ ఓవర్లో అవుట్ అయ్యాడు. ఈ 164 పరుగులే రికీ పాంటింగ్ కు వన్డేలలో అత్యధిక వ్యక్తిగత స్కోర్ గా నిలిచిపోయింది. వన్డే క్రికెట్లో గొప్ప ఫినిషర్లలో ఒకడైన మైక్ హస్సి 51 బంతుల్లో 9ఫోర్లు, 3 సిక్సులతో 81 పరుగులు చేయడంతో ఆస్ట్రేలియా 434 భారీ పరుగులు చేయగలిగింది. వన్డే క్రికెట్లో ఒక జట్టు 400 పరుగులకంటే ఎక్కువ చేయడం ఇదే మొదటిసారి. 434 పరుగులతో ఆస్ట్రేలియా వన్డేలలో 7వ స్థానంలో నిలిచింది. 

6. సౌత్ ఆఫ్రికా vs ఇండియా 438/4 

2015 న ముంబై లో సౌత్ ఆఫ్రికా, ఇండియా మధ్య జరిగిన ఈ మ్యాచ్ ఓ వన్డేలో ఇండియాపై అధిక పరుగులు చేసిన జట్టుగా సౌత్ ఆఫ్రికా నిలిచింది. మొదటి బ్యాటింగ్ చేసిన సౌత్ ఆఫ్రికా బ్యాట్సమన్లలో ఏకంగా ముగ్గురు సెంచరీలు చేసి ఇండియా బౌలర్లను ఓ ఆటాడుకున్నారు. ఓపెనర్ గా వచ్చిన యంగ్ అండ్ ఎనర్జిటిక్ క్రికెటర్ క్వింటన్ డికాక్ 87 బంతుల్లో 17 ఫోర్లు, 1సిక్సుతో 109 పరుగులు చేసి పార్ట్ టైమర్ రైనా బౌలింగ్ లో అవుట్ అయ్యాడు. సౌత్ ఆఫ్రికా నిలకడ గా పరుగులు చేసే ఆటగాడు డుప్లెసిస్ 115 బంతుల్లో 9 ఫోర్లు, 6 సిక్సులతో 133 పరుగులు చేసి రిటైర్డ్ హర్ట్ అయ్యాడు. నాల్గవ స్థానంలో వచ్చిన  ఏ.బి. డివిలియర్స్ ఇండియన్ బౌలర్లకు చుక్కలు చూపించాడు. కేవలం 61 బంతుల్లోనే 3 ఫోర్లు, 11సిక్సులతో స్టేడియం దద్దరిల్లిపోయేటట్లు కొట్టాడు. దీంతో వన్డే క్రికెట్ చరిత్రలో ఒక ఇన్నింగ్సులో  ముగ్గురు సెంచరీలతో కదం తొక్కడం ఇది రెండోసారి. ఈ మ్యాచులో సౌత్ ఆఫ్రికా నిర్ణీత ఓవర్లలో నాలుగు వికెట్లను 438 పరుగులు చేసింది. ఈ స్కోర్ వన్డే క్రికెట్లోనే ఆరో అత్యధిక స్కోర్ గా నిలిచింది.     

5. సౌత్ ఆఫ్రికా vs ఆస్ట్రేలియా 438/9

2006 న సౌత్ ఆఫ్రికా ఆస్ట్రేలియా మధ్య జరిగిన ఈ మ్యాచులో మొదట బ్యాటింగ్ చేసిన ఆస్ట్రేలియా మొదటిసారి 400 కు పైగా ఎక్కువ పరుగులు చేసి 50 ఓవర్లలో 434 పరుగులు చేసింది. ఆస్ట్రేలియా నిర్ధేశించిన 435 భారీ  పరుగుల లక్ష్యాన్ని చేధించే క్రమంలో కెప్టెన్ గ్రేమ్ స్మిత్ అదిరిపోయే ఆరంభం ఇచ్చాడు. కేవలం 55 బంతుల్లోనే 13 ఫోర్లు, 2సిక్సులతో 90 పరుగులు చేసి అవుట్ అయ్యాడు. 3వ స్థానంలో వచ్చిన గిబ్స్  తన వన్డే కెరీర్లోనే అత్యధిక వ్యక్తిగత స్కోర్ సాధించాడు. ఆరంభంనుంచి బౌలర్లను చీల్చి చెండాడి కేవలం 111 బంతుల్లో 21 ఫోర్లు, 7సిక్సులతో 175 పరుగులు చేసి వీరంగం సృష్టించాడు. దీంతో పాటు మార్క్ బౌచర్ 50 పరుగులతో మ్యాచ్ ముగించడంతో ఎవరూ కలలో కూడా ఊహించలేని భారీ లక్ష్యాన్ని ఒక బంతి మిగిలించి చేధించి చరిత్ర సృష్టించారు.ఈ మ్యాచులో సౌత్ ఆఫ్రికా చేసిన 438 పరుగులే ఇప్పటికి వన్డేలో చేసింగ్ చేసిన అత్యధిక పరుగులు లేదా ఒక వన్డేలో రెండవ ఇన్నింగ్సులో చేసిన అధిక పరుగులు. 

4. సౌత్ ఆఫ్రికా vs వెస్ట్ ఇండీస్ 439/2 

2015 న జోహనెస్బర్గ్ లో జరిగిన ఈ మ్యాచ్ వన్డేలలోనే అనేక రికార్డులను తిరగరాసిన మ్యాచుగా నిలిచింది. వెస్ట్ ఇండీస్  టాస్ గెలిచి ఫీల్డింగ్ ఎంచుకుంది. బహుశా ఫీల్డింగ్ ఎంచుకోవడమే వారు చేసిన తప్పు అనుకుంటాను. మొదట బ్యాటింగ్ చేసిన సౌత్ ఆఫ్రికాకు అదిరిపోయే ఆరంభం లభించింది. నిలకడకు మారుపేరైన హషీమ్ ఆమ్లా, యువ ఆటగాడు రిలీ రూసో సెంచరీలతో రెచ్చిపోయి మొదటి వికెట్కు 247 పరుగుల భాగస్వామ్యం నిలిపారు. ఆమ్లా 142 బంతుల్లో 14 ఫోర్లతో  153 పరుగులతో నాట్ అవుట్ గా  నిలువగా రూసో 115 బంతుల్లో 128 పరుగులు చేసి వేగంగా ఆడే ప్రయత్నంలో అవుట్ అయ్యాడు. మూడవ స్థానంలో బ్యాటింగ్ కి వచ్చిన  డివిలియర్స్ ఆకాశమే హద్దుగా రెచ్చిపోయి ఆడిన సునామి ఇన్నింగ్స్ ధాటికి  వెస్ట్ ఇండీస్ బౌలర్లు విలవిలలాడిపొయ్యారు. కేవలం 44 బంతుల్లోనే 9 ఫోర్లు, 16 సిక్సులతో 149 పరుగులు చేసి అవుట్ అయ్యాడు. వన్డే క్రికెట్ చరిత్రలోనే మొట్టమొదటిసారి ఒక ఇన్నింగ్స్ లో ముగ్గురు సెంచరీలు చేసిన మ్యాచ్ గాను , వన్డేలలో ఫాస్టెస్ట్ సెంచరీ చేసిన రికార్డును ఈ మ్యాచులోనే సంభవించాయి. ఈ మ్యాచులో సౌత్ ఆఫ్రికా చేసిన 439 పరుగులు వన్డేలలో నాల్గవ అత్యధిక పరుగులు. 

3. శ్రీలంక vs నెదర్లాండ్స్ 443/9

2006 జూలై నాల్గవ తేదీన జరిగిన మ్యాచులో శ్రీలంక,నెదర్లాండ్స్ తో తలపడింది. టాస్ గెలిచిన శ్రీలంక మొదట బ్యాటింగ్ తీసుకోగా దూకుడుకు మారుపేరైన సనత్ జయసూర్య నెదర్లాండ్స్ బౌలర్లమీద ఏమాత్రం జాలి లేకుండా గ్రౌండ్ నలువైపులా బంతిని బౌండరీకి తరుముతూ బౌలర్లను కకావికలం చేసాడు. కేవలం 104 బంతుల్లోనే 24 ఫోర్లు, 1సిక్సుతో 157 పరుగులు చేసి  శ్రీలంక 291 పరుగులు ఉన్న సమయాన వికెట్ సమర్పించుకున్నాడు. అయితే 5వ స్థానంలో బ్యాటింగుకు దిగిన దిల్షాన్ జయసూర్య ప్రారంభించిన అదే దూకుడు చివరివరకు కొనసాగించి 78 బంతుల్లో 15 ఫోర్లు, 2సిక్సులతో 117 పరుగులతో నాట్ ఔట్ గా నిలిచాడు. దీంతో శ్రీలంక నిర్ణీత ఓవర్లలో 443 పరుగులు చేసి అదే సంవత్సరంలో సౌత్ ఆఫ్రికా పేరుమీద వున్న అత్యధిక రికార్డులను తెరమరుగు చేసి తమ పేరట రాసుకున్నారు. ప్రస్తుతం ఇది మూడవ స్థానంలో నిలిచింది.  

2. ఇంగ్లాండ్ vs పాకిస్థాన్ 443/3

2016 లో జరిగిన ఈ మ్యాచ్ లో మొదట బ్యాటింగ్ చేసిన ఇంగ్లాండ్ కు జాసన్ రాయ్ ఆరంభంలోనే ఔట్ కాగా మరో ఓపెనర్ అలెక్స్ హేల్స్ తన భయంకరమైన ఆటతీరుతో పాకిస్థాన్ బౌలర్లను ఇరగదీశాడు. కేవలం 122 బంతుల్లో 22 ఫోర్లు, 4సిక్సులతో 171 చేసి 37 వ ఓవర్లో ఔట్ అయ్యి డబుల్ సెంచరీ చేసే అవకాశాన్ని జారవిడుచుకున్నాడు. జో రూట్ 86 బంతుల్లో 8ఫోర్లతో 85 పరుగులు చేసి తనవంతు పాత్ర పోషించాడు. ప్రస్తుతం ఇంగ్లాండ్ క్రికెట్కు అండదండగా ఉండి ఫినిషింగ్ పాత్ర పోషిస్తున్న బట్లర్, కెప్టెన్ ఇయాన్ మోర్గాన్ తమ నైపుణ్యాన్ని, శక్తిసామర్థ్యాల్ని ఉపయోగించి చివరి ఓవర్లలో ధాటిగా ఆడడంతో 443 పరుగులు చేయగలిగింది. ఇందులో బట్లర్ 51 బంతుల్లో 7 ఫోర్లు, 7సిక్సులతో 90 పరుగులతో అజేయంగా నిలువగా, మోర్గాన్ 27 బంతుల్లో 3 ఫోర్లు, 5సిక్సులతో 57 పరుగులతో అజేయంగా నిలిచాడు. ఈ మ్యాచులో ఇంగ్లాండ్ చేసిన 443 పరుగులు వన్డేలలోనే ఒక ఇన్నింగ్సులో అత్యధిక పరుగుల జాబితాలో రెండవ స్థానంలో నిలిచింది. 

1. ఇంగ్లాండ్ vs  ఆస్ట్రేలియా 481/6  

ప్రస్తుతం ఇంగ్లాండ్ జట్టు పూర్తిగా భారీ హిట్టర్లతో నిండి ఉంది. ఆ జట్టుతో తలపడాలంటే ఏ జట్టు బౌలర్లకైనా వణుకు పుట్టాల్సిందే. మేటి బౌలర్లుసైతం వారి ముందు తేలిపోవడం ఖాయమనే చెప్పవచ్చు. 2018 జూన్ 18 న ఇంగ్లాండ్, ఆస్ట్రేలియా మధ్య జరిగిన మ్యాచ్లో ఇంగ్లాండ్ వన్డేలలోనే అత్యధిక పరుగులు చేసి చరిత్ర సృష్టించింది. మొదట బ్యాటింగ్ చేసిన ఇంగ్లాండుకు అదిరిపోయే ఆరంభం ఇచ్చిన జాసన్ రాయ్ 61 బంతుల్లో 7 ఫోర్లు, 4సిక్సులతో 82 పరుగులకు ఔట్ కాగా మరో ఓపెనర్ బెయిర్ స్టో 92 బంతులాడి 15 ఫోర్లు, 5సిక్సులతో 139 పరుగులు చేసి పెవిలియన్ చేరుతాడు. అయితే మొదటి స్థానంలో దిగిన అలెక్స్ హేల్స్ 92 బంతుల్లో 16 ఫోర్లు, 5సిక్సులతో 147 పరుగులు చేసిన భారీ పరుగులు చేయడంలో కీలకపాత్ర పోషించదు. చివర్లో కెప్టెన్ మోర్గాన్ మెరుపులు మెరిపించి 30 బంతుల్లో 3 ఫోర్లు 5 సిక్సులతో 67 పరుగులు చేయడంతో 6 వికెట్ల నష్టానికి 481 పరుగులు చేయగలిగింది. వన్డేలలో 450కి పైగా పరుగులు చేయడం ఇదే మొదటిసారి. 481 పరుగులతో వన్డేలలో ఒక ఇన్నింగ్సులో అత్యధిక పరుగులు చేసిన జట్టుగా నిలిచింది.

టీ 20లలో ఒక ఇన్నింగ్సులో అత్యధిక పరుగులు చేసిన జట్లను క్రిందటి లింక్ లో చూడగలరు.  

https://telugucricinfo.blogspot.com/2020/06/highest-innings-total-in-t20s-20-10.html 

ధన్యవాదాలు 

మీ అభిప్రాయాలు తెలియజేయగలరు.