Most Sixes in an ODI innings,వన్డేలలో ఒక ఇన్నింగ్సులో అత్యధిక సిక్సులు కొట్టిన వారి టాప్ 10 జాబితా

సిక్సులు కొట్టడం అనేది ఒక కళ, అది అందరిలోనూ ఉండదు. కొందరు తమ కళాత్మకమైన ఆటతో చూడముచ్చటైన షాట్లతో బంతిని బౌండరీ బయటకు పంపుతుంటే, మరికొందరు తమ బలాన్ని, శక్తి సామర్థ్యాలను ఉపయోగించి బంతిని బాది సిక్సులు కొడుతుంటారు. ఎవరు ఎలా ఆడినా ఎంత బలాన్ని ఉపయోగించినా అంతిమంగా వారి లక్ష్యం మాత్రం బౌలర్లు వేసిన బంతిని స్టేడియం బయటకు పంపడమే, ప్రేక్షకులకు వినోదాన్ని పంచడమే. ఈ విధంగా బ్యాట్సమన్లు బౌలర్లమీద తమ ఆధిపత్యం చెలాయించి ఒక ఇన్నింగ్సులో అత్యధిక సిక్సులు కొట్టిన వారి జాబితాను పరిశీలిద్దాము. 

1. ఇయాన్ మోర్గాన్(ఇంగ్లాండ్) vs ఆఫ్ఘానిస్తాన్,  17 సిక్సులు 

2019 వరల్డ్ కప్లో ఇంగ్లాండ్, ఆఫ్ఘానిస్తాన్ మధ్య జరిగిన లీగ్ మ్యాచులో సిక్సుల ప్రపంచ రికార్డు నెలకొల్పబడింది. టాస్ గెలిచి బ్యాటింగ్ ఎంచుకున్న ఇంగ్లాండ్ కు ఓపెనర్ బెయిర్స్టో 90 పరుగులు చేసి అవుట్ కాగా జట్టు స్కోర్ 164 పరుగులు వున్నప్పుడు నాల్గవ స్థానంలో క్రీజులోకి వచ్చిన కెప్టెన్ ఇయాన్ మోర్గాన్ కేవలం 71 బంతులు ఆడి 4 ఫోర్లు, 17 సిక్సులకు 148 పరుగులతో బౌలర్లమీద ఎటువంటి కనికరం చూపకుండా ఎంతో క్రూరంగా  సిక్సర్ల వర్షం కురిపించాడు. ముఖ్యంగా ప్రస్తుత తరంలోని బెస్ట్ స్పిన్ బౌలర్లలో ఒకడైన రషీద్ ఖాన్ బౌలింగ్ ని ఉతికి ఆరేసి తన కెరియర్లోనే మరిచిపోలేని  రోజుగా మిగిల్చాడు. మోర్గాన్ తన భయంకరమైన ఇన్నింగుతో 17 సిక్సులు కొట్టి వన్డేలలోనే ఒక ఇన్నింగ్సులో అత్యధిక సిక్సులు కొట్టినవాడుగా రికార్డు నెలకొల్పాడు. అలాగే ఒక ఇన్నింగ్సులో అత్యధిక సిక్సులు కొట్టిన జట్టుగా ఇంగ్లాండ్ 25 సిక్సులతో మొదటి స్థానంలో నిలిచింది.         
  

2. రోహిత్ శర్మ (ఇండియా) vs ఆస్ట్రేలియా, 16 సిక్సులు

క్రికెట్లోనే ఎంతో సునాయాసంగా బంతిని బౌండరీ దాటించగల అతి కొద్దిమందిలో రోహిత్ శర్మ ఒకడు. బలాన్ని శక్తి సామర్ధ్యాలను  ఉపయోగించకుండా సిక్సులు ఎలా కొట్టాలో బహుశా మనం రోహిత్ శర్మను చూసి తెలుసుకోవచ్చు. 2013 వ సంవత్సరాన బెంగళూరులో ఆస్ట్రేలియాతో జరిగిన మ్యాచులో తన భీకర బ్యాటింగుతో చిన్నస్వామి స్టేడియం మొత్తం సిక్సులతో హోరెత్తించాడు. టాస్ ఓడి బ్యాటింగ్ చేసిన ఇండియాకు ఆరంభంనుండి ఆచితూచి ఆడుతూ వచ్చిన రోహిత్ చివరి ఓవర్లలో బౌలర్లమీద విరుచుకుపడి సిక్సులతో ప్రేక్షకులను ఉర్రూతలూగిలించాడు. రోహిత్ శర్మ 158 బంతుల్లో 12 ఫోర్లు, 16 సిక్సులతో 209 పరుగులు చేసి డబుల్ సెంచరీ కొట్టిన మూడవ ఆటగాడిగాను అప్పటికి ఒక ఇన్నింగ్సులో అత్యధిక సిక్సులు కొట్టినవాడుగాను చరిత్ర పుటల్లోకెక్కాడు. ప్రస్తుత రోహిత్ శర్మ 16 సిక్సులతో రెండవ స్థానంలో నిలిచాడు.   
      

3. ఏ.బి డివిలియర్స్ (సౌత్ ఆఫ్రికా) vs వెస్ట్ ఇండీస్, 16

ఏ.బి డివిలియర్స్ కు సిక్సులు కొట్టడం అనేది వెన్నతో పెట్టిన విద్య. బ్యాట్సమన్లు ప్రతి ఒక్కరు వారి వారి సామర్థ్యానికి తగినట్లు ఒక వైపు మాత్రమే సిక్సులు కొడుతుంటే డివిలియర్స్ మాత్రం  ప్రతి మూలకు సిక్సులు కొట్టి Mr.360 అని పిలువబడ్డాడు. 2015 జనవరి 18న వెస్ట్ ఇండీస్ తో జరిగిన మ్యాచులో మొదట బ్యాటింగ్ చేసిన సౌత్ ఆఫ్రికాకు ఆమ్లా, రూసో 247 పరుగుల భాగస్వామ్యంతో భారీ పరుగులకు పునాది వేయగా 39 వ ఓవర్లో క్రీజులోకి వచ్చిన డివిలియర్స్ 44 బంతుల్లోనే 16 సిక్సులు, 9 ఫోర్లతో 149 పరుగులు చేసి తన ప్రతాపం విండీస్ బౌలర్లమీద చూపించి సిక్సులు సునామి సృష్టించాడు. విండీస్ బౌలర్లు వేసిన బంతులు వేసినట్లే బయటకు పంపించాడు అని చెప్పవచ్చు.  దీంతో సౌత్ ఆఫ్రికా 439 పరుగుల భారీ లక్ష్యాన్ని నిర్ధేశియించగలిగింది. లక్ష్య ఛేదనలో విండీస్ 291 పరుగులు మాత్రమే చేసి 148 పరుగుల తేడాతో ఓటమి పాలవ్వడంతో వన్డేలలో ఫాస్టెస్ట్ సెంచరీతోపాటు 16 సిక్సులు బాదిన డివిలియర్స్ కు మాన్ అఫ్ ది అవార్డు లభించింది.  

4. క్రిస్ గేల్( వెస్ట్ ఇండీస్) vs జింబాబ్వే, 16 

క్రిస్ గేల్ సిక్సుల వీరుడు టీ 20ల ధీరుడు. తన పేరు చెబితే మేటి బౌలర్లకు నిద్రలోకూడా చెమటలు పడుతాయి. అంతటి విధ్వంసకర ఆటగాడు 2015 ఫిభ్రవరి 24న జింబాబ్వేతో జరిగిన వరల్డ్ కప్ మ్యాచులో ఏకంగా 16 సిక్సులు కొట్టి తనంటే బౌలర్లకు ఎందుకంత భయమో తెలియజేసాడు. టాస్ గెలిచి బ్యాటింగ్ చేసిన విండీస్ కు క్రిస్ గేల్ తన మెరుపు బ్యాటింగ్తో పిడుగుల్లాంటి సిక్సులు కొట్టి భయాందళోనలు సృష్టించాడు. ఇందులో గేల్ 147 బంతుల్లో 10 ఫోర్లు, 16 సిక్సులతో 215 పరుగులతో వరల్డ్ కప్లో మొట్టమొదటి డబల్ సెంచరీ చేసిన వాడిగాను ఫాస్టెస్ట్ డబల్ సెంచరీ చేసిన వాడుగాను చరిత్రలో నిలిచిపోయాడు. విండీస్ 73 పరుగుల తేడాతో గెలవడంతో  విజయంలో కీలకపాత్ర పోషించిన గేల్ కు మాన్ ఆఫ్ ది మ్యాచ్ అవార్డు లభించింది.  గేల్ కొట్టిన 16 సిక్సులతో వన్డేలలో ఒక ఇన్నింగ్సులో అత్యధిక సిక్సులు కొట్టిన వారి జాబితాలో నాల్గవ స్థానంలో నిలిచాడు.  
    

5. షేన్ వాట్సన్ (ఆస్ట్రేలియా) vs బంగ్లాదేశ్, 15

షేన్ వాట్సన్ ఆస్ట్రేలియా తరుపున ఆడిన ఉన్నత ఆల్ రౌండర్లలో ఒకడు. తన బ్యాటింగుతోను, బౌలింగ్తోను ఎన్నోమార్లు ఒంటి చేత్తో విజయాలను అందించిన ఆటగాడు. 2011 వ సంవత్సరంలో బంగ్లాదేశ్తో జరిగిన మ్యాచులో 15 సిక్సులు కొట్టి తన హిట్టింగ్ పవరేంటో చూపించి అప్పటికి ఒక ఇన్నింగ్సులో అత్యధిక సిక్సులు కొట్టిన ఆటగాడిగా నిలిచాడు. టాస్ గెలిచి మొదట బ్యాటింగ్ చేసిన బంగ్లాదేశ్ ముస్పికర్ రహీమ్ 81 పరుగులతో రాణించడంతో 50 ఓవర్లలో 7 వికెట్లకు 229 పరుగులు చేయగలిగింది. 230 పరుగుల లక్ష్యాన్ని ఛేదించే క్రమంలో ఓపెనర్గా వచ్చిన వాట్సన్ మొదటి ఓవర్లోనే 3 ఫోర్లతో తాను ఎలా ఆడపోతున్నాడో తెలియజేసాడు. కేవలం 96 బంతుల్లో 15 ఫోర్లు, 15 సిక్సులతో 185 పరుగులు భీభత్సకరమైన ఇన్నింగ్స్ ఆడాడు. 15 సిక్సులు కొట్టి వాట్సన్ అయిదవ స్థానంలో నిలిచాడు. 
         

6. కోరి అండర్సన్(న్యూజిలాండ్) vs వెస్ట్ ఇండీస్, 14

                                                        source-cricketworld.com

కోరి ఆండర్సన్ న్యూజిలాండ్ ఆల్ రౌండర్. ఇతడు భారీ షాట్లకు చిరునామా అని చెప్పవచ్చు. 2014 జనవరి 1 న వెస్ట్ ఇండీస్ తో జరిగిన వన్డే మ్యాచులో  ఏకంగా 14 సిక్సులు కొట్టి విండీస్ బౌలర్లకు వణుకు పుట్టించాడు. ఈ మ్యాచును వర్షం కారణంగా అంపైర్లు 21 ఓవర్లకు కుదించడంతో ఐదవ స్థానంలో దిగిన అండర్సన్ అప్పటికే విండీస్ బౌలర్లను ఒక ఆట ఆడుకుంటున్న జెస్సి రైడర్ తో కలిసి వేసిన బంతులను వేసినట్లు గ్రౌండ్ నలుమూలలా బౌండరీ దాటించాడు. కేవలం 36 బంతుల్లోనే సెంచరీ చేసి అప్పటికి ఫాస్టెస్ట్ సెంచరీ చేసినవాడుగా రికార్డు నెలకొల్పాడు. 47 బంతులాడిన అండర్సన్ 6 ఫోర్లు, 14 సిక్సులతో 131 పరుగులు చేసి నాట్ అవుట్ గా నిలిచాడు. దీంతో ఒక ఇన్నింగ్సులో అత్యధిక సిక్సులు కొట్టినవారి జాబితాలో 14 సిక్సులతో 6వ స్థానంలో నిలిచాడు.    

7. క్రిస్ గేల్( వెస్ట్ ఇండీస్) vs ఇంగ్లాండ్, 14

క్రిస్ గేల్ పేరు వింటేనే ఎంతోమంది బౌలర్లకు గుండెల్లో రైళ్లు పరుగెత్తుతాయి అంటే అతిశయోక్తి కాదు. 2019 ఫిభ్రవరి 27 వ తేదీన ఇంగ్లాండ్తో జరిగిన వన్డేలో ఏకంగా 14 సిక్సులు కొట్టి ఇంగ్లీష్ బౌలర్లను సిక్సులతో చావగొట్టాడు. టాస్ ఓడి మొదట బ్యాటింగ్ చేసిన ఇంగ్లాండ్కు బ్యాట్సమన్లు అదరగొట్టడంతో 50 ఓవర్లలో 418 పరుగులు చేయగలిగింది. 419 పరుగుల ఛేధించేక్రమంలో మిగిలిన బ్యాట్సమన్లు విఫలమైనప్పటికీ క్రిస్ గేల్ మాత్రం ఒంటరిపోరాటం చేసి ఏకంగా 97 బంతుల్లోనే 11 ఫోర్లు, 14 సిక్సులతో 162 పరుగులు చేసి విండీస్ను గెలిపించినంత పని చేసి ఔటయ్యాడు. వెస్ట్ ఇండీస్ ఓడినప్పటికీ  క్రిస్ గేల్ తన విధ్వంసకర ఇన్నింగ్సులో 14 భారీ సిక్సులు కొట్టి అభిమానులకు వినోదాన్ని పంచాడు.  
       

8. తిసార పెరీరా (శ్రీలంక) vs న్యూజిలాండ్, 13

crictracker.com 

తీసార పెరీరా శ్రీలంక తరుపున ఆడుతున్న మంచి అల్ రౌండర్. జట్టుకు అవసరమైన ప్రతిసారి వికెట్లు తీస్తూ చివరి ఓవర్లలో వేగంగా కీలక పరుగులు సాధిస్తూ జట్టు విజయాలకు  తోడ్పడుతూ ఉంటాడు. 2019 జనవరి 5న న్యూజిలాండ్తో జరిగిన మ్యాచులో ఏకంగా 13 సిక్సులు కొట్టి తన సత్తా చాటాడు. టాస్ గెలిచిన న్యూజిలాండ్ మొదట బ్యాటింగ్ ప్రారంభించి మున్రో, టేలర్, నీషం అర్ధ సెంచరీలు చేయడంతో 319 పరుగులు చేయగలిగింది. లక్ష్య ఛేధనలో శ్రీలంక బ్యాట్సమన్లు అంతా కుప్పకూలడంతో బ్యాటింగ్ బాధ్యతను తీసార పెరీరా తన భుజాన వేసుకుని న్యూజిలాండ్ బౌలింగ్ను ఒంటి చేత్తో తుత్తునియలు చేసాడు.  గుణతిలక మాత్రమే 73 బంతుల్లో 9ఫోర్లకు 71 పరుగులు చేయడంతో తీసారా పెరీరా మాత్రం 74 బంతుల్లో 8 ఫోర్లు, 13 సిక్సులతో 140 చేసి వన్డేలలో తన మొదటి సెంచరీనే భారీగా మలిచి దాదాపు  గెలిపించినంత పని చేసాడు.            

9. మార్షల్ (వెస్ట్ ఇండీస్) vs కెనడా, 12

                                       source-Espncricinfo.com 

2008 ఆగష్టు 22 న వెస్ట్ ఇండీస్ కెనడా మధ్య జరిగిన ఒక మ్యాచులో వెస్ట్ ఇండీస్ బ్యాట్సమన్ జేవియర్ మార్షల్ 12 సిక్సులు కొట్టి అప్పటికి వన్డేలలో ఒక ఇన్నింగ్సులో అత్యధిక సిక్సులు కొట్టిన రికార్డు తన పేరట రాసుకున్నాడు. టాస్ గెలిచి మొదట బ్యాటింగ్ చేసిన వెస్ట్ ఇండీస్ నాల్గవ స్థానంలో దిగిన మార్షల్  వెస్ట్ ఇండీస్ వాళ్ళ పవర్ హిట్టింగ్  ఎలా ఉంటుందో కెనడా బౌలర్లకు చూపించాడు. 118 బంతులాడిన మార్షల్ 11 ఫోర్లు, 12 సిక్సులతో ఏకంగా 157 పరుగులు చేసి నాట్ అవుట్ గా నిలిచాడు. దీంతో వెస్ట్ ఇండీస్ 50 ఓవర్లలో 303 పరుగులు చేసింది. కెనడా ఛేదనలో రిజ్వాన్ చీమా ఒక్కడు మాత్రమే 69 బంతుల్లో 10ఫోర్లు, 6సిక్సులతో 89 పరుగులు చేసి రాణించడంతో 254 పరుగులు మాత్రమే చేసి 49 పరుగుల తేడాతో ఓటమి పాలయ్యింది. వెస్ట్ ఇండీస్ విజయంలో కీలకపాత్ర పోషించిన మార్షల్ మాన్ ఆఫ్ ది మ్యాచ్ అవార్డు పొందాడు.         

10. రోహిత్ శర్మ (ఇండియా) vs శ్రీలంక,12 

సిక్సులు కొట్టడం అనేది రోహిత్ శర్మకు మంచి నీళ్లు తాగినంత సులభం అనేది అతడు ఎటువంటి శ్రమ లేకుండా కొట్టే విధానం చూస్తే మనకు అర్ధమవుతుంది. 2017 న ఇండియా, శ్రీలంకకు జరిగిన మ్యాచులో ఏకంగా 12 సిక్సులు కొట్టాడు.  టాస్ ఓడి బ్యాటింగ్ చేసిన ఇండియాకు కెప్టెన్ రోహిత్ శర్మ ఆరంభంనుంచి క్రీజులో పాతుకుపోయి అడపాదడపా బ్యాట్ జుళిపిస్తూ వచ్చాడు. చివర్లోమాత్రం తన అసలైన ఆటను బయటకు తీసి బౌలర్లను చింపేసాడు. ఏకంగా తన కెరీర్లోనే మూడవ డబుల్ సెంచరీ చేసి క్రికెట్లోనే ఏ ఒక్కరు సాధించలేని, దరిదాపుల్లోకి రాలేని రికార్డు నెలకొల్పాడు. 153 బంతుల్లో 13 ఫోర్లు 12 సిక్సులతో 208 పరుగులు చేసి తన నిలకడను చూపించాడు. లక్మల్ వేసిన 44 వ ఓవర్లో అయితే ఏకంగా నాలుగు సిక్సులు కొట్టి బౌలర్ బాక్స్ బద్దలు కొట్టాడు. ఈ ఇన్నింగ్సుతో రోహిత్ మూడవ డబల్ సెంచరీతోపాటు వన్డేలలో ఒక ఇన్నింగ్సులో అత్యధిక సిక్సులు కొట్టినవారి జాబితాలో 12 సిక్సులతో 10 వ స్థానంలో నిలిచాడు. 

ధన్యవాదాలు 
మీ అభిప్రాయాలు కామెంట్లరూపంలో తెలియజేయగలరు.